🏀 "Rockets" jamoasining so'nggi yangiliklari

"Xyuston Rokets" klubi bosh murabbiyi Ime Udoka matbuot vakillari bilan suhbatda jamoaning asosiy tarkib futbolchilaridan biri Fred VanVleetning jismoniy holati haqida ma'lumot berdi. Bir yil avval tizzasidan jiddiy jarohat olgan tajribali basketbolchi hozirda reabilitatsiya jarayonining so'nggi bosqichida turibdi. Udoka o'zining shaxsiy tajribasidan kelib chiqib, bunday og'ir tiklanish davrida barcha zarur bosqichlarni bosib o'tish muhimligini ta'kidladi. VanVleet kelasi oy boshlanadigan mavsumoldi o'yinlarining birinchisida maydonga tushishga umid qilmoqda.

Klub rahbariyati boshqa o'zgarishlarga ham e'tibor qaratdi. Xususan, jamoa bosh direktori Rafael Ston yaqinda Amen Tompson bilan tuzilgan besh yillik yangi kelishuv tafsilotlarini o'rtoqlashdi. Uning so'zlariga ko'ra, tomonlar o'rtasidagi bu qadam mutlaqo tabiiy va o'zaro manfaatli qaror bo'lgan, chunki klub ham, basketbolchining o'zi ham hamkorlikni davom ettirishni istagan.

Shu bilan birga, "Rokets" murabbiylar shtabi tajribali mutaxassis Chip Engelland bilan boyidi. Ligada o'zining otish texnikasi va o'yinchilarni rivojlantirish bo'yicha mahorati bilan tanilgan bu murabbiy Ime Udoka bilan qariyb yigirma yillik tanishuvga ega. Udokaning ta'kidlashicha, Engelland shtabdagi bir qator yosh mutaxassislarga ustozlik qilgan va uning jamoaga kelishi barcha uchun katta foyda keltiradi. Hozirning o'zida u Amen Tompsonning sakrab turib tashlash texnikasi ustida ish boshlab yuborgan.