Ettore Messina NBAga qaytmoqda! 🏀

Yevropa basketbolining afsonaviy mutaxassisl tratoqlaridan biri Ettore Messina Milliy basketbol assotsiatsiyasiga qaytmoqda. Eurohoops.net nashri tarqatgan ma'lumotlarga ko'ra, u "Atlanta Hawks" klubiga maslahatchi sifatida qo'shiladi. Ushbu tayinlov tufayli u o'z vaqtida SSKA Moskva jamoasida birga ishlagan, hozirda esa "Hawks" bosh murabbiyi bo'lib turgan Kuin Snayder bilan yana hamkorlik qiladi.

Sentyabr oyi oxirida 67 yoshni qarshi oladigan Messina NBAda boy tajribaga ega. U 2011/12-yilgi mavsumda "Los-Anjeles Leykers" jamoasida maslahatchi bo'lib ishlagan, shuningdek, 2014-2019-yillarda Gregg Popovich qo'l ostida "San-Antonio Spurs" klubida bosh murabbiy yordamchisi vazifasini bajargan. So'nggi yillarda u o'z vatani Italiyaning "Olimpia Milano" jamoasini boshqargan va shu yozda klub bilan xayrlashgandi.

Faoliyati davomida Messina Yevropaning eng buyuk murabbiylaridan biri sifatida tan olingan. U to'rt bor Yevroliga chempionligini qo'lga kiritgan va o'z jamoalarini 12 marta "Final Four" bosqichiga olib chiqqan. Shuningdek, u ikki karra Yevroliga mavsumining eng yaxshi murabbiyi deb topilgan bo'lib, Italiyada yetti marta va Rossiya chempionatida olti marotaba zafar quchgan.

Qayd etilishicha, mutaxassisning yangi lavozimi unga Italiyada qolish imkonini beradi. Jumladan, u "Sky Sports" telekanalida televideniye tahlilchisi sifatida ham ishlashi kutilmoqda.