Rafael Varan «Real» va «MYU»ni taqqosladi ⚽

Tajribali himoyachi Rafael Varan faoliyatidagi muhim burilish – Madridning «Real» klubidan Angliyaning «Manchester Yunayted» jamoasiga o‘tish jarayoni haqida to‘xtalib o‘tdi. Uning so‘zlariga ko‘ra, ispaniyaliklardan ingliz klubiga yo‘l olish uzoq davom etgan bosqich bo‘lib, bu borada u ko‘p o‘ylagan va yakuniy qarorga kelish oson kechmagan.

Varan Madridni tark etish sababini tushuntirar ekan, u yerda jamoaga o‘zining bor salohiyati hamda kuchini to‘liq baxsh etganini bildirdi. Shu boisdan futbolchi o‘zi uchun yangi chaqiriqlar topish hamda o‘zgacha hissiyotlarni boshdan kechirishni maqsad qilgan. Angliya Premyer-ligasi esa yuqori saviyadagi chempionat ekani uchun aynan shu yerga kelishni xohlagan.

Shuningdek, futbolchi «Real» hamda «Manchester Yunayted» safidagi bosimni bir-biriga solishtirdi. Uning fikricha, bunday ulkan klublarda futbolchilarga talablar juda yuqori bo‘lgani sababli, bosim darajasi har ikki jamoada ham deyarli bir xil darajada namoyon bo‘ladi.

Har ikki grand jamoa har doim maydonda faqat g‘alaba qozonish uchun kurashishini ta’kidlagan Varan, mag‘lubiyat yoki durang natijalar har ikkala jamoada ham salbiy qabul qilinishini qo‘shimcha qildi.