Kuminga "Boʻrizlar"ni nima uchun tanladi? 🏀

Jonatan Kuminga boshqa klublar moliyaviy jihatdan ancha yuqori shartnomalar taklif qilganiga qaramay, "Minnesota Timberwolves" jamoasini tanlashiga jamoaning uni o'z safiga qo'shib olishdagi samimiy urinishlari sabab bo'lganini ta'kidladi. "The Athletic" nashri jurnalisti Jon Kravchinskiyning yozishicha, bu iliq munosabat payshanba kuni bo'lib o'tgan tanishtiruv matbuot anjumanida ham yaqqol sezilib turgan. Target Center arenasidagi ulkan ekranda unga bag'ishlangan "Xush kelibsiz" yozuvi namoyish etilgan.

Kuminga jamoa vakillari bilan suhbatlar unga o'ta samimiy tuyulganini va aynan shu narsa o'ziga xos ishonch uyg'otganini aytib o'tdi. Jumladan, yetakchi Entoni Edvards bilan telefon orqali muloqot qilgani, shuningdek, klub prezidenti Tim Konneli va xodim Alonzo Gee bilan uchrashuvlar uning Minnesota jamoasini tanlashiga zamin yaratgan. Shuningdek, klub xo'jayini Aleks Rodriges ham o'z navbatida u bilan bog'langan.

Klub rahbariyatining bu sa'y-harakatlari o'z samrasini berib, avgust oyi oxirida Kuminga ikki yillik 12.5 million dollarlik shartnomaga imzo chekdi. Ushbu kelishuvning ikkinchi yili basketbolchining o'z xohishiga ko'ra uzaytirilish huquqini o'z ichiga oladi. Bungacha "Golden Steyt" safida murabbiy Stiv Kerr bilan kelishmovchiliklarni boshdan kechirgan va fevral oyida "Atlanta"ga o'tgan hujumchi yakunda erkin agentga aylangandi.

"Timberwolves" safida Kuminga o'zi uzoq vaqtdan beri istab kelgan kafolatlangan asosiy tarkibdagi o'rniga ega bo'lishi kutilmoqda. Yozgi mavsumda Yulius Rendl va Naz Ridni almashtirib yuborgan Minnesota klubiga kuchli hujumchi suv va havodek kerak edi. Aynan shu omil boshqa jamoalar uning maoshini ikki baravar oshirib berishga tayyor bo'lgan bir paytda, Tim Konneliga Kumingani ko'ndirishda qo'l keldi.

Qayd etilishicha, "Leykers" va "Bleyzers" kabi jamoalar ham Kuminga uchun kurash olib borgan va moliyaviy jihatdan ancha yaxshi takliflar bergan. Biroq turli sabablarga ko'ra mazkur transferlar amalga oshmadi. Jamoa prezidenti Tim Konneli bu transferni ayni vaqtda yuz bergan omadli kelishuv deb atab, jamoa uning maydonda va maydon tashqarisidagi xislatlariga muhtoj ekanini ta'kidladi.