"Real" Holand transferini rejalashtirmoqda ⚽

Ispaniyaning "Real" (Madrid) klubi transfer bozoridagi navbatdagi katta rejasini belgilab oldi. OAV xabarlariga ko‘ra, qirollik klubi "Manchester Siti" hujumchisi Erling Holandni o‘z safiga qo‘shib olish ustida ish olib bormoqda. Madridliklar futbolchini 2027-yilning yozida sotib olishni rejalashtirgan, chunki aynan shu davrga kelib uning amaldagi shartnomasida tovon puli belgilanadigan band paydo bo‘lishi kutilmoqda.

Biroq vaziyat unchalik oddiy emas. Angliya klubi rahbariyati norvegiyalik to‘purarning shartnomasida hech qanday tovon puli imkoniyati yo‘qligini qat’iy ta’kidlamoqda. Tomonlar o‘rtasidagi amaldagi kelishuv juda uzoq muddatga mo‘ljallangan bo‘lib, 2034-yilning yozigacha imzolangan.

Erling Holand joriy mavsumni ham juda yuqori saviyada boshladi. U "Manchester Siti" safida shu vaqtgacha 4 ta uchrashuvda maydonga tushib, raqiblar darvozasiga 5 ta gol kiritishga muvaffaq bo‘ldi. Shartnomaning amal qilish muddati uzoqligiga qaramay, futbolchi atrofidagi transfer mish-mishlari tinmayapti.