"Spartak" Fedotov vaziyati haqida gapirdi 🏒

Moskvaning "Spartak" klubi sport direktori Roman Belyaev darvozabon Ivan Fedotov atrofidagi vaziyat va uning SSKA safida maydonga tushishi ehtimoli haqida fikr bildirdi. Bu mavzu so'nggi paytlarda xokkey olamida jiddiy muhokamalarga sabab bo'lmoqda.

Xabaringiz bor, o'tgan yili darvozabon Ivan Fedotov "Filadelfiya Flayers" bilan shartnoma imzolagan edi. Biroq u harbiy xizmatga chaqirilgani sababli Milliy xokkey ligasiga keta olmadi. Harbiy xizmatni o'tab qaytgach, posbon SSKA klubi bilan yangi shartnoma tuzdi.

Ushbu holat Kontinental xokkey ligasi va NHL o'rtasida ziddiyat keltirib chiqardi. Xalqaro xokkey federatsiyasi Ivan Fedotodni joriy yilning birinchi sentyabridan boshlab diskvalifikatsiya qilish qaroriga keldi. Shunga qaramay, SSKA ushbu qaror va ko'rsatmani bajarmasligi mumkinligi haqida taxminlar mavjud.

Roman Belyaevning so'zlariga ko'ra, hozirgi reglamentga ko'ra ba'zi qadamlarni tashlab bo'lmaydi va birinchi sentyabrlik muddat hamda XIIXning munosabatini kutish talab etiladi. Shuningdek, u o'z jamoasida shartnoma tuzib turib klubni tark etish haqida o'ylaydigan o'yinchilar yo'qligini, har bir xokkeychi o'z bitimini oxirigacha halol bajarishi lozimligini qo'shimcha qildi.

Eslatib o'tamiz, Ivan Fedotov 2021/2022-yilgi mavsum yakunlariga ko'ra SSKA tarkibida Gagarin kubogini qo'lga kiritgan. Shuningdek, u 2022-yilda Rossiya terma jamoasi safida Olimpiya o'yinlarining kumush medaliga sazovor bo'lgan.