"Boston Seltiks" Devin Karter bilan qiziqmoqda 🏀

"Boston Seltiks" klubi Devin Karter jamoasiz qolgan taqdirda uni o'z safiga qo'shib olish imkoniyatlarini ko'rib chiqmoqda. Bu haqda taniqli insayderlar xabar berishdi. Avvalroq "Atlanta" klubi iqtidorli himoyachini o'z tarkibidan chiqarib yuborgan edi. Atlanta jamoasi iyun oyining oxirida Karter hamda 2033-yilgi ikkinchi raund draft huquqini "Sakramento" bilan bo'lgan ayirboshlash orqali qo'lga kiritgan edi.

Eslatib o'tamiz, Devin Karter 2024-yilgi draftning o'n uchinchi raqami ostida tanlangan. Talabalik davrida u o'zining muvaffaqiyatli o'yinlari bilan ajralib turgan va yuqori statistik natijalarni qayd etgan edi. Biroq uning professional ligadagi faoliyati jarohatlar girdobida qoldi. Chap yelkasidagi operatsiya tufayli uning debyuti kechikdi, shuningdek, keyingi mavsumlarda ham turli jarohatlar uni bezovta qildi. Natijada u ikki yil davomida atigi 74 ta uchrashuvda maydonga tushib, pastroq ko'rsatkichlarni qayd etdi.

Shunga qaramay, mavsum oxiriga kelib Karter o'yin vaqtini ko'proq olgan paytda ancha yaxshi natijalarni ko'rsata boshladi. Oxirgi o'n ikkita uchrashuvda u o'z statistikasini sezilarli darajada yaxshilashga muvaffaq bo'ldi. Mutaxassislarning fikricha, agar yosh basketbolchi muntazam o'yin amaliyotiga ega bo'lsa, o'z salohiyatini to'liq ochib bera oladi.

Moliyaviy tomondan olib qaraganda, "Boston" hozirda lyuks solig'i chegarasidan taxminan 1,7 million dollar pastda turibdi va ularning tarkibida 14 nafar kafolatlangan shartnomali o'yinchi bor. Agar Karter minimal maosh asosidagi bir yillik shartnoma imzolasa, bu jamoa uchun 2,45 million dollarlik moliyaviy yuklamani hosil qiladi. Shunga qaramay, kelishuvning aniq shartlari va uning qaysi jamoani tanlashi hozircha noma'lumligicha qolmoqda.

Ma'lumot uchun, Devin Karter sobiq mashhur NBA o'yinchisi Entoni Kartering o'g'li hisoblanadi. Ayni paytda uning otasi "Memfis" jamoasida murabbiy yordamchisi sifatida faoliyat yuritib kelmoqda.