Toshkentdagi restoranlar egasi qidiruvga berilishini izohladi 🔍

Toshkent shahrida oʻz muassasalariga ega boʻlgan taniqli tadbirkor va restorator Aleksandr Orlov uning xalqaro qidiruvga berilgani haqidagi xabarlarga izoh berdi. Avvalroq OAVda unga nisbatan Rossiya Federatsiyasi Jinoyat kodeksining mulkka zarar yetkazish moddasi boʻyicha jinoiy ish qoʻzgʻatilgani haqida maʼlumotlar tarqalgan edi.

Mazkur jinoiy ishga tadbirkorga tegishli boʻlgan "Merkuriy Fitnes" fitnes markazining ijara haqi boʻyicha yuzaga kelgan qarzdorligi sabab boʻlgani aytilgandi. Jabrlanuvchi tomon sudga murojaat qilib, 110 million rubl miqdorida daʼvo kiritgan.

Aleksandr Orlovning tushuntirishicha, ijara munosabatlari yuzasidan sud jarayoni ikki yildan ortiq vaqt davom etgan. Ular ijara uchun qarzdor boʻlishgani holda, mazkur obyektga mablagʻ ham kiritishganini taʼkidlagan. Jinoiy ish esa aynan shu ijara shartnomasi doirasida mol-mulkka zarar yetkazish moddasi boʻyicha ochilgan.

Tadbirkorning soʻzlariga koʻra, u Rossiyada boʻlmagani va uni topa olishmagani sababli qidiruvga eʼlon qilingan. Hozirda uning advokatlari faoliyat yuritmoqda va jabrlanuvchi tomon bilan muloqot olib borilmoqda. Orlov barcha masalalar, jumladan, tinchlik bitimini imzolash yoʻli bilan yaqin oylarda hal etilishiga umid bildirdi.

Shuningdek, u yuzaga kelgan bu vaziyat uning rahbarligida Oʻzbekistonda ochilgan restoranlar faoliyatiga umuman taʼsir qilmasligini qayd etdi. U har doim masofadan boshqarib kelganini va hech qanday cheklovlar yoʻqligini aytdi. Kelgusi yil boshida Toshkentda uchta yangi – yunon, gruzin va baliq restoranlarini ochish rejalashtirilgan. Ayni paytda tadbirkor Londonda boʻlib, u yerda "Gaia" yunon restoranining ochilish marosimida qatnashgan.