Mark Uilyams operatsiya qilindi 🏀

"Feniks Sanz" jamoasining markaziy o'yinchisi Mark Uilyams mavsumoldi mashg'ulotlaridan birida chap yelka bo'g'imi yirtilishi jarohatini oldi. ESPN xodimi Shams Charanianing ma'lum qilishicha, tajribali basketbolchi payshanba kuni ushbu jarohatni bartaraf etish uchun jarrohlik stoliga yotgan.

Jamoaga yaqin bo'lgan jurnalist Jon Gambadoroning ta'kidlashicha, Uilyamsning to'liq safga qaytishi uchun taxminan besh oy vaqt ketadi. Agar kutilmagan muammolar yuzaga kelmasa, u fevral oyida o'yinlarda qatnasha boshlashi mumkin. Shunga qaramay, u muntazam mavsumning ma'lum bir qismini o'tkazib yuborishi aniq bo'lib qoldi.

Eslatib o'tamiz, Uilyams faoliyatining ilk uch mavsumida "Sharlott Hornets" safida o'ynab, oyoq, bosh barmoq va bel jarohatlari bilan qiynalgan edi. O'tgan yili "Sanz"ga kelib qo'shilgan markaziy o'yinchi 60 ta uchrashuvda maydonga tushib, har bir o'yinda o'rtacha 11.7 ochko, 8.0 ribaund va 0.9 blokshot amalga oshirdi. Iyun oyida esa klub bilan uch yillik 38 million dollarlik yangi shartnoma imzolagan edi.

Uilyamsning uzoq muddatga safdan chiqqani fonida, "Feniks" yosh markaziy o'yinchilar Oso Igodaro va Xaman Maluachga ko'proq tayanishi kutilmoqda. Igodaro o'tgan mavsum barcha 82 ta o'yinda maydonga tushib, foydali o'yin ko'rsatgan bo'lsa, yosh iqtidor Maluach yozgi ligadagi yorqin o'yinlari orqali bosh murabbiy Ishonchini qozonishga tayyorligini ko'rsatgan edi.