Izak Adjar Ozarbayjon GPda qaytishi mumkin 🏎

Red Bull jamoasi oʻz poygachisi Izak Adjar ning bilak jarohatidan soʻng 26-sentyabr kuni Ozarbayjon Gran-prisida ishtirok etishini taʼminlash ustida ishlamoqda. 21 yoshli fransuz sportchisi Madridda boʻlib oʻtadigan Ispaniya Gran-prisida ham qatnasha olmaydi va bu uning joriy mavsumdagi ketma-ket oʻtkazib yuborayotgan uchinchi poygasi boʻlib qoladi.

Red Bull rahbari Loran Mekies Sky Sports telekanaliga bergan intervyusida poygachiga yana dam berish qarori qiyin kelmaganini taʼkidladi. Uning soʻzlariga koʻra, asosiy mezon sportchining oʻzini yuz foiz yaxshi his qilishi hisoblanadi. Jamoa Adjar toʻliq tayyor boʻlmaguncha uni tavakkal qilib poygaga chiqarishni istamagan, chunki bu uning toʻliq tiklanish jarayonini choʻzib yuborishi mumkin edi.

Ispaniya bosqichida Adjar ning oʻrnini yana Liam Louson egallaydi va u toʻrt karra jahon chempioni Maks Ferstappenga sherik boʻladi. Mekiesning fikricha, Ozarbayjon poygasigacha boʻlgan ikki haftalik tanaffusdan unumli foydalanish toʻgʻri qaror boʻlgan.

Jamoa rahbarining qoʻshimcha qilishicha, Adjar ning sogʻayish jarayoni reja asosida ketmoqda va hech qanday muammo yoʻq. Bokudagi bosqichdan oldin uning ahvoli sinchiklab baholanib, simulyatorda sinovdan oʻtkazilishi kutilmoqda. Izak Adjar yozgi tanaffusdagi mashgʻulotlar vaqtida jarohat olgan boʻlib, joriy mavsumdagi 11 ta poygada uch marta kuchli beshlikka kirgan va chempionat jadvalida sakkizinchi oʻrinni egallab turibdi.