Australian Open besh setli formatni saqlab qoladi 🎾

Avstraliya ochiq chempionati tashkilotchilari erkaklar o‘rtasidagi "Katta dubulg‘a" turnirlarida besh setli format o‘zgarmasligini va amalda qolishini rasman tasdiqladilar. Ushbu bayonot musobaqa bosh direktori kelgusida turnir bosqichlarining davomiyligini qisqartirish ehtimoli borligini aytganidan bir necha kun o‘tib e’lon qilindi.

O‘tgan dushanba kuni Avstraliyadagi SportNXT sammitida chiqish qilgan Tennis Australia rahbari Endryu Abdo kelgusida barcha bosqichlarda ham besh set o‘ynalmasligi yoki ochko to‘plash tizimi o‘zgarishi mumkinligini taxmin qilgan edi. Uning so‘zlariga ko‘ra, tomoshabinlar e’tiborini oshirish uchun uchrashuvlar davomiyligini qisqartirish masalalari muhokama qilingan.

Hozirgi kunda "Katta dubulg‘a" turkumiga kiruvchi to‘rtta musobaqa – Australian Open, Fransiya ochiq chempionati, Uimbldon va AQSh ochiq chempionati erkaklar o‘rtasida faqat besh setli tizimdan foydalanadigan yagona turnirlar hisoblanadi. Avvalroq Novak Jokovich setlarni olti o‘rniga to‘rt g‘alabagacha o‘ynashni taklif qilgan bo‘lsa, tennischi Frensis Tiafoe ham besh setli o‘yinlarni har doim ham yoqtirmasligini tan olgan edi.

Biroq payshanba kuni ijtimoiy tarmoqlardagi sahifalarida Australian Open o‘zining an’anaviy qaroriga sodiqligini yana bir bor tasdiqladi. Turnir bayonotida innovatsiyalar muhimligi, biroq besh setli tennis o‘z kuchida qolishi ta’kidlanib, 2027-yilgi musobaqa yangiliklari tez orada e’lon qilinishi bildirildi.