Bennedict Mathurin "Pelicans" bilan shartnoma imzoladi 🏀

Bennedict Mathurin o'zining "New Orleans Pelicans" jamoasi bilan ikki yillik 16 million dollarlik shartnomasini rasman yakunladi. NBA.com rasmiy qaydnomalariga ko'ra, tomonlar o'rtasidagi mazkur bitim ikki hafta oldin kelishib olingan edi. Yangi shartnomaga ko'ra, ikkinchi mavsumda o'yinchi opsiyasi ko'zda tutilgan.

"Pelicans" ushbu transferni amalga oshirish uchun avvalroq tarkibda va moliyaviy masalalarda o'zgarishlar qilgan edi. Klub Jordan Hawkins, Micah Peavy, shuningdek ikkinchi raund draft huquqi va tanlov almashinuvini Memfisga jo'natib, evaziga AJ Johnson hamda Taj Gibsonni o'z safiga qo'shib oldi. Keyinchalik esa maoshlarni muvofiqlashtirish uchun jamoaga kelgan Taj Gibson qo'yib yuborildi.

Mathurin avvalroq cheklangan erkin agent maqomida edi, ammo uning vakillari Los-Anjeles klubiga murojaat qilib, 8.8 million dollarlik taklifni chaqirib olishni so'ragan. Natijada u cheklanmagan erkin agentga aylandi va "Pelicans" bilan to'g'ridan-to'g'ri shartnoma tuzish imkoniyatiga ega bo'ldi. Iyul oyining o'rtalarigacha jamoalar bu qarorni bir tomonlama bajarish huquqiga ega edi, biroq mavsum davomida o'yinchining roziligi bilan ham shunday yo'l tutish mumkin bo'lgan.

Oldinroq "Bulls", "Bucks" va "Mavericks" klublari ham qiziqish bildirganiga qaramay, Mathurin uzoq muddatli va kattaroq summadagi takliflar o'rniga qisqa muddatli bitimni afzal ko'rdi. "ESPN" xabariga ko'ra, Nyu-Orlean klubi basketbolchini bir yildan ortiq vaqtdan beri kuzatib kelayotgandi va u jamoaning yosh o'zak tarkibining muhim qismiga aylanishiga umid qilmoqda.

Kvebekning Monreal shahridan bo'lgan Mathurin Arizona universitetida ikki mavsum o'ynagach, 2022 yilgi draftda oltinchi raqam ostida tanlangandi. U "Pacers" safida uch yarim mavsum o'ynab, fevral oyida Ivica Zubac transferi doirasida Los-Anjelesga ko'chib o'tgandi. O'tgan mavsumda u har bir o'yinda o'rtacha 17.4 ochko, 5.5 ta ribaund va 2.5 ta golli uzatma amalga oshirgan.

Ushbu shartnoma imzolangandan so'ng, "Pelicans" klubining kafolatlangan standart shartnomaga ega o'yinchilari soni 14 nafarga etdi. Shuningdek, yana bir nechta basketbolchilar qisman kafolatlangan yoki kafolatlanmagan bitimlar asosida o'quv-mashg'ulot yig'iniga jalb etilgan.