🥊 Topuriya Reytingda Yuqoriga Ko‘tarildi

Sherdog nashri aralash yakkakurashlar bo‘yicha yangilangan eng kuchli jangchilar reytingini e’lon qildi. Unga ko‘ra, so‘nggi jangida ajoyib natija ko‘rsatgan sportchilar o‘z o‘rinlarini o‘zgartirishdi.

Abu-Dabida o‘tgan UFC 308 turnirining markaziy jangida o‘z so‘zining ustidan chiqqan Iliya Topuriya Maks Holloueyni nokautga uchratdi. Ushbu g‘alaba unga reytingda sezilarli o‘sishni ta’minlab, Aleks Pereyra va Jon Jonsni ortda qoldirib ikkinchi o‘ringa chiqish imkonini berdi.

Birinchi o‘rinni esa Islam Maxachev egallab turibdi. 26 g‘alaba va 1 mag‘lubiyatga ega bo‘lgan yengil vazn chempioni o‘zining ketma-ket 14-g‘alabasini yoz oxirida Dustin Poryega qarshi kechgan bahsda qo‘lga kiritgan edi.

Reytingning kuchli beshligidan Jon Jons va Aleks Pereyra ham joy olgan. Xususan, og‘ir vazn toifasidagi jangchi Jon Jons noyabr oyida Stipe Miochichga qarshi jang o‘tkazishi rejalashtirilgan bo‘lsa, yarim og‘ir vazn chempioni Pereyra oxirgi marta Xalil Runtorini mag‘lub etgan edi.