Krishtianu Ronaldu faoliyatidagi 32-sovrinni qo‘lga kiritdi 🏆

Turinning «Yuventus» klubi Italiya A Seriyasining 36-turi doirasida o‘tkazilgan bahsda «Sampdoriya»ni 2:0 hisobida taslim etdi. Ushbu g‘alaba jamoaga mavsum yakunlanishiga yana ikki tur qolganining o‘zida muddatidan avval chempionlik masalasini ijobiy hal etish imkonini berdi.

«Keksa sinyora» sharafini himoya qilayotgan 35 yoshli hujumchi Krishtianu Ronaldu uchun bu Turin jamoasi tarkibidagi ketma-ket ikkinchi chempionlik unvoni bo‘ldi. Qolaversa, bu uning «Yuventus» safida qo‘lga kiritgan umumiy hisobdagi uchinchi sovriniga aylandi. Eslatib o‘tamiz, Ronaldu 2018 yilda o‘zining turinliklardagi ilk sovrini sifatida Italiya Superkubogini ham qo‘lga kiritgan edi.

Ma'lumot o‘rnida, mashhur portugaliyalik futbolchi o‘zining professional faoliyati davomida jami 32 ta sovrinni qo‘lga kiritishga muvaffaq bo‘ldi. U o‘zining turli yillardagi klublari safida hamda milliy terma jamoasi bilan ham qator nufuzli musobaqalarda g‘olib chiqqan.

Xususan, Ronaldu o‘z vaqtida «Sporting» klubi safida 1 ta, «Manchester Yunayted»da 10 ta, «Real»da esa 16 ta sovringa ega chiqqan. Shuningdek, u «Yuventus» tarkibida turli musobaqalarda 3 marta zafar quchdi. Uning xalqaro miqyosdagi muvaffaqiyatlari qatoriga Portugaliya terma jamoasi bilan qo‘lga kiritilgan Yevro—2016 va 2018/2019 yilgi mavsumdagi Millatlar Ligasi chempionliklari ham kiradi.