"Nasaf" klubidagi muammolar ⚽

Qarshining "Nasaf" jamoasi O'zbekiston Kubogida zafar quchib, OCHL saralash bosqichi yo'llanmasini qo'lga kiritganidan so'ng, muxlislar yangi mavsumda moliyaviy ahvol ijobiy tomonga o'zgarishidan umid qilishgan edi. Biroq klub rahbariyati avvalgi uslubida ish olib borishda davom etmoqda. Oldinda "Baniyas"ga qarshi o'yin turgan bo'lsa-da, jamoa Sharof Muhitdinovning transferini ham rasman e'lon qila olmadi. Agar "Nasaf" mazkur raqibni mag'lub etsa, "Sug'diyona"ni ham OFK musobaqasiga olib chiqish imkoniyati paydo bo'ladi. Bunday mas'uliyatli pallada sifatli transferlar suv va havodek zarur edi.

Afsuski, Abdilaye Diakiyete bilan yuzaga kelgan mojaro sababli "Nasaf" o'z tarkibini kuchaytira olgani yo'q. Bu holat to'g'ridan-to'g'ri rahbarlarning e'tiborsizligi oqibatida kelib chiqdi. FIFA tomonidan yuborilgan ogohlantirish xatini hech kim o'z vaqtida tekshirmagan va oqibatda jamoaga transfer taqiqi qo'yildi. Masala o'z vaqtida hal etilganida, hammasini arzimagan mablag' evaziga yopish mumkin edi. Endilikda esa moliyaviy qiyinchiliklarni boshdan kechirayotgan klub 100 ming dollar miqdorida jarima to'lashga majbur bo'lmoqda.

Klubdagi muammolar faqat transferlar bilan cheklanib qolmayapti. Oxirgi yillarda o'zbek futboliga ko'plab iste'dodlarni yetkazib berayotgan "Nasaf" akademiyasidagi ahvol ham tashvish uyg'otmoqda. Xususan, joriy yilning 5-yanvar sanasida akademiya tarbiyalanuvchilarida yegulik taqchilligi kuzatilgan. Viyatni hal qilish uchun bosh murabbiy Ro'ziqul Berdiyev o'z yonidan xarajat qilib, yosh futbolchilarga oziq-ovqat olib borgani ma'lum bo'ldi.

So'nggi o'n yil davomida Ro'ziqul Berdiyev boshchiligidagi jamoa ko'plab o'yinchilarni voyaga yetkazdi va ularning darajasini oshirdi. Har yili klub akademiyasini o'nlab yosh futbolchilar tamomlaydi. Shunday ekan, o'zbek futbolining bayroqdorlaridan biriga aylangan "Nasaf" atrofidagi bunday kamchiliklar jamoaning xalqaro maydondagi natijalariga salbiy ta'sir ko'rsatishi mumkin.