🏀 Dvayt Xovard Gruziyaga o'tdi

Sakkiz karra "Barcha yulduzlar" va uch karra liganing eng yaxshi himoya o'yinchisi deb topilgan Dvayt Xovard 2022 yildan buyon Milliy basketbol assosiasiyasida o'ynamayotgan edi va joriy yilning mart oyida rasman nafaqaga chiqqanini ma'lum qilgandi. Biroq tajribali basketbolchi sportni tark etishga shoshilmayapti. U Gruziya A-ligasi vakili "Blek Fortres Tbilisi" jamoasi bilan kelishuvga erishdi. Shu yilning dekabr oyida 41 yoshga to'digan sportchi so'nggi yillarda Tayvan, Puerto-Riko hamda BIG3 musobaqalarida ishtirok etgan va yangi mavsum oldidan Osiyodagi ko'rgazmali o'yinlarda qatnashmoqda.

Xalqaro basketbol sahnasida yana bir qator muhim o'zgarishlar yuz bermoqda. Xususan, Yevroliga klublari egalari oktyabr oyida Italiyada yig'ilish o'tkazishni rejalashtirgan. Mazkur uchrashuvda NBA Yevropa bilan hamkorlik qilish masadga muvofiqmi yoki amaldagi Yevroliga formatini saqlab qolgan holda Xalqaro basketbol federasiyasidan mustaqil ravishda faoliyat yuritish kerakmi, degan savolga oydinlik kiritiladi.

Shuningdek, 2015-2022 yillar oralig'ida yettita jamoa safida 452 ta o'yin o'tkazgan faxriy himoyachi Lengston Galloui Italiyaning "Pallacanestro Trieste" klubiga o'tdi. 34 yoshli basketbolchi so'nggi mavsumlarda Italiya va Turkiya jamoalarida o'ynagan, shuningdek, AQSh milliy jamoasi safida, jumladan 2025 yilgi Amerika kubogida ham qatnashgan edi.

Avstraliyaning Milliy basketbol ligasida qatnashuvchi "Pert Uayldkets" klubi o'z safiga yangi hujumkor o'yinchi qo'shib olishni rejalashtirmoqda. ESPN xabariga ko'ra, klub nishonidagi basketbolchilardan biri Brendon Nayt hisoblanadi. 2011-2022 yillarda oltita NBA jamoasida 451 ta o'yin o'tkazgan 34 yoshli sportchi so'nggi mavsumlarni Puerto-Riko va Gretsiyada o'tkazgan.

Bundan tashqari, 2026/27 yilgi mavsumdan Yevrokubokda ishtirok etadigan yangi Italiyaning "Roma" klubi NBAning sobiq rahbari Brayan Kolanjelo va "Golden Steyt" yulduzi hamda shon-shuhrat zali a'zosi Kris Mallin jamoaning maslahat kengashiga qo'shilganini rasman tasdiqladi.