🏎 Alonso Singapurda ochko oldi!

«Aston Martin» poygachisi Fernando Alonso Singapurda yakunlangan Formula-1 bosqichida ochko jamg'arishga muvaffaq bo'ldi. U murosasiz kechgan bahsda marra chizig'ini sakkizinchi bo'lib kesib o'tdi. Shundan so'ng ispaniyalik tajribali poygachi bu safargi musobaqa jismoniy jihatdan o'ta og'ir kelganini, biroq qiyinchiliklarni yengib o'tib, jamoaga muhim ochkolar keltirganini ta'kidladi. Uning so'zlariga ko'ra, raqiblar bilan kurashda to'g'ri taktika tanlanib, shinlar bir necha tur oldin almashtirilgan va bu o'z samarasini bergan.

Alonso butun dam olish kunlari davomida bolidni boshqarish oson bo'lmaganini, yakunda esa Ferrari jamoasidan bor-yo'g'i bir necha soniya ortda qolgan holda juda yaxshi natija qayd etilganini qo'shimcha qildi. Endi jamoa vakillari yaqin haftalarda Silverstounda qizg'in mehnat qilib, navbatdagi Ostin bosqichiga qadar avtomobil tezligini yaxshilashni maqsad qilgan.

Shu bilan birga, Fernando Alonsoning jamoadog'i Lens Stroll uchun Singapur poygasi omadsizroq yakunlandi. Kanadalik sportchi musobaqani 14-o'rinda yakunladi. Stroll boks chiqish davrasida g'alati tebranishlarni sezgani va jamoa xavfsizlik maqsadida zudlik bilan tormoz jamlanmasini almashtirgani haqida gapirdi. U qizg'in havoda tezkor harakat qilgan mexaniklarga o'z minnatdorchiligini bildirdi.

Lensning fikricha, jamoa oldindan bu poyga qiyin kechishini bilgan va yakshanba kuni ham avvalgi kunlardagidek ilashish hamda balans muammolaridan aziyat chekkan. Biroq poygachi Ostinda butunlay boshqa trassa kutayotganini va bu trek ularning bolidiga ko'proq mos kelishidan umid qilishini bildirdi.