Bog‘chaga imtiyozli navbat qo‘yish to‘liq avtomatlashtirildi 👶

O‘zbekistonda ota-onalarning davlat maktabgacha ta’lim tashkilotlariga imtiyozli tartibda navbatga yozilish jarayoni to‘liq avtomatlashtirilgan shaklga o‘tkazildi. Endilikda my.gov.uz portali orqali amalga oshiriladigan ushbu xizmat fuqarolarning vaqtini tejash hamda byurokratik to‘siqlarni bartaraf etishga qaratilgan.

Yangi tartibga ko‘ra, imtiyozli toifadagi bolalarni bog‘chaga joylashtirishda ota-onalardan qog‘oz shaklidagi ma’lumotnomalar yoki boshqa tasdiqlovchi hujjatlarni yig‘ib yurish talab etilmaydi. Portalning integratsiyalashgan aqlli tizimi taqdim etilgan ma’lumotlarni tegishli vazirlik va idoralarning idoralararo axborot bazalari orqali real vaqt rejimida mustaqil ravishda tekshirib, veritifikatsiyadan o‘tkazadi.

Ushbu soddalashtirilgan tizimdan foydalanish uchun ota-onalar portalda yoki uning rasmiy mobil ilovasida avtorizatsiyadan o‘tishlari lozim. Shundan so‘ng «Bolani davlat maktabgacha ta’lim tashkilotiga qabul qilish» xizmati tanlanib, ariza to‘ldiriladi, bog‘cha tanlanadi va tegishli imtiyoz turi ko‘rsatiladi.

Imtiyozlar qatoriga harbiy xizmatchilar, ichki ishlar va bojxona xodimlari, I hamda II guruh nogironligi bo‘lgan shaxslarning farzandlari, yetim bolalar, kam ta’minlangan va ko‘p bolali oilalar farzandlari kiradi. Shuningdek, «Ayollar daftari»ga kiritilgan yolg‘iz ayollarning farzandlari, talabalar, barcha bosqichdagi ta’lim muassasalari pedagoglari, boquvchisini yo‘qotgan oilalar hamda akasi yoki opasi tanlangan bog‘chaga qatnayotgan oilalarga ham ushbu imtiyozlar tatbiq etiladi.