🚀 Xitoylik kosmonavtlar Tiangong stansiyasiga yetib keldi

Chorshanba kuni uch nafar xitoylik fazogir orbital kosmik stansiyaga muvaffaqiyatli kirib bordi. Xitoyning shimoli-g'arbiy qismidagi Szyutszyan kosmodromidan tong saharlab yo'l olgan Shenzhou-19 kosmik kemasi muvaffaqiyatli uchirilgani e'lon qilindi. Parvozdan taxminan o'n daqiqa o'tgach, kema raketadan ajralib, belgilangan orbitaga chiqdi va stansiyaning Tianhe asosiy moduli bilan avtomatik tarzda tutashdi.

Kosmonavtlar jamoasi tarkibidan mamlakatning yagona ayol kosmik parvoz muhandisi bo'lgan 34 yoshli Vang Haoze ham o'rin oldi. U Xitoy tarixida boshqariladigan kosmik missiyada qatnashayotgan uchinchi ayol hisoblanadi. Shuningdek, ekipajni sobiq harbiy uchuvchi Tsay Syuchje boshqaradi. 48 yoshli Tsay avvalroq 2022 yildagi Shenzhou-14 missiyasida ham qatnashgan tajribali mutaxassisdir. Jamoaning uchinchi a'zosi esa 34 yoshli Son Lindong bo'lib, umumiy uchlik kelgusi yilning aprel oyi oxiri yoki may oyining boshida Yerga qaytishi rejalashtirilgan.

Stansiyaga yetib borgan yangi ekipaj oldingi Shenzhou-18 missiyasi vakillari bilan uchrashdi. Har ikki jamoa rejalashtirilgan vazifalar hamda ishlarni topshirish jarayonini amalga oshirish uchun taxminan besh kun davomida birga yashab, faoliyat yuritadi. Shenzhou-18 ekipaji esa noyabr oyining boshida Yerga qaytib kelishi kutilmoqda.

Xitoyning ushbu kosmik dasturi kelgusida 2030 yilgacha Oyga astronavtlar qo'ndirish va vaqti-kelib oy bazasini qurish maqsadini ko'zlagan. Yangi ekipaj a'zolari kosmosda turli ilmiy tajribalar o'tkazishni rejalashtirgan. Mamlakat rahbariyati ostida kengayib borayotgan kosmik dastur bundan avval ham Mars va Oyga robot-raverlarni muvaffaqiyatli yetkazib bergan edi.