BMT Hindistonning yutuqlarini yuqori baholadi 🇮🇳

BMT Aholishunoslik jamg‘armasi (YUNFPA) ijrochi direktori Nataliya Kanem Asian News International (ANI) axborot agentligiga bergan intervyusida Hindiston erishgan ulkan natijalarni alohida e'tirof etdi. Uning so‘zlariga ko‘ra, mamlakat qashshoqlik darajasini sezilarli darajada qisqartirishga muvaffaq bo‘lgan hamda aholining elektr energiyasi, toza ichimlik suvi va yaxshilangan sanitariya sharoitlaridan foydalanish imkoniyatlarini kengaytirgan.

Kanem xonim bunday yuqori natijalarni ko‘rsatayotgan respublika bilan hamkorlik qilish tashkilot uchun katta faxr ekanini ta'kidladi. U Hindistondagi rivojlanish sur'atlari juda ta'sirli ekanini, mamlakat ijobiy o‘zgarishlarning yorqin namunasiga aylanganini qayd etdi. Xususan, Hindistondagi har bir olg‘a qadam ko‘plab jamoalarga, eng avvalo, qishloq hududlarida yashovchi aholiga o‘z ta'sirini ko‘rsatmoqda.

Bundan tashqari, YUNFPA rahbari Hindistonning Janub – Janub hamkorligi yo‘nalishidagi faolligiga ham e'tibor qaratdi. Mamlakat o‘z mintaqasidagi va undan tashqaridagi davlatlarga barqaror rivojlanish maqsadlariga erishishda ko‘maklashib kelmoqda.

Texnologiya va raqamli xizmatlar sohasi ham e'tibordan chetda qolmadi. Qayd etilishicha, Hindistonning raqamli innovatsiyalari chekka hududlardagi hayotni sezilarli darajada osonlashtirmoqda, chunki fuqarolar muhim davlat xizmatlaridan to‘g‘ridan-to‘g‘ri o‘z mobil telefonlari orqali foydalanish imkoniyatiga ega bo‘ldilar. Yuqori martabali BMT vakilining mazkur tashrifi Hindiston va YUNFPA o‘rtasidagi sheriklik munosabatlarining 50 yilligiga to‘g‘ri keldi.