🏀 Kaufman-Renn va NCAA ishi bo'yicha qaror

"The Indianapolis Star" nashri xabariga ko'ra, "Purdue" jamoasining sobiq hujumchisi Trey Kaufman-Renn NCAA tashkilotiga qarshi sud orqali vaqtinchalik cheklov buyrug'ini qo'lga kiritdi. Bu qaror unga kollej basketbolida oltinchi mavsumda maydonga tushish imkoniyatini izlashga vaqtinchalik imkon beradi.

Klar okrugi sudi sudyasi Kayl P. Vilyams chorshanba kuni sportchining avgust oyi oxirida bergan da'vosi bo'yicha shunday qaror chiqardi. Unga ko'ra, NCAA basketbolchining kollejda o'tkazgan besh yili, "Boilermakers" safidagi to'rt yillik o'yini yoki uning professional maqomiga tayanib ishtirok etishini rad eta olmaydi.

Sud qarorida NCAA o'z ta'lim muassasalariga Kaufman-Rennni jamoaga jalb qilish, qabul qilish va ro'yxatdan o'tkazishga ruxsat berishi shartligi ta'kidlangan. Shuningdek, u jamoa a'zosi bo'lishi va uning imtiyozlaridan foydalanishi mumkin. Biroq dastlabki taqiq bo'yicha alohida sud majlisi hali belgilanmagan bo'lib, aynan shu masala uning joriy mavsumda o'ynashini hal qiladi.

Joriy cheklovga ko'ra, Kaufman-Renn professional shartnoma imzolashi yoki professional jamoadan daromad olishi taqiqlangan. Eslatib o'tamiz, u joriy draftda "Timberwolves" tomonidan tanlangan va Yozgi ligada beshta o'yinda qatnashgan, ammo hali shartnoma tuzmagan. Minnesota klubi rahbariyati uning kollejga qaytish urinishlarini qo'llab-quvvatlamoqda.

Sportchining so'zlariga ko'ra, bir nechta kollej murabbiylari u bilan bog'lanib, o'z qiziqishlarini bildirishgan. Shuningdek, u "Purdue" safiga qaytmasligini tasdiqlagan. Advokatlar boshqa sportchilar kabi to'liq besh yil o'ynash imkoniyati berilishi kerakligini ta'kidlashgan.