Shara Bullet: "Men rusiyalik dogʻistonlikman!" 🏴‍☠️

Er-Riyod shahrida oʻtkazilgan UFC on ABC 6 musobaqasida braziliyalik Antoni Trukolini uchinchi raundda nokautga uchratgan rossiyalik oʻrta vazn vakili Sharabutdin Magomedov dunyoning eng nufuzli ligasidagi ikkinchi gʻalabasidan keyin jurnalistlarning savollariga javob berdi. "Shara Bullet" laqabi bilan tanilgan jangchi oʻzini ajoyib his qilayotgani va istasa ertagayoq oktagonga chiqishga tayyorligini maʼlum qildi. Uning soʻzlariga koʻra, u har bir jang orqali UFC rahbariyati ishonchini qozonish hamda muxlislar qalbini zabt etishni maqsad qilgan.

Raqibning oʻzgarishi unga qoʻshimcha motivatsiya berganini taʼkidlagan sportchi qarshisidagi raqib hatto Jon Jons va Aleks Pereyradan ham yirikroq boʻlganini, biroq bu uning uchun ahamiyatsiz ekanini bildirdi. U oktagon eshigi yopilishi bilan oʻzini haqiqiy piratdek his qilishini va oldinga intilishini aytdi. Jang oldindan rejalashtirilgan ssenariy boʻyicha kechib, u raqibini toliqtirib, kurashishga uringan vaqtida tizzasi bilan zarba berib muvaffaqiyatga erishdi.

Matbuot anjumanida unga jang qilish istagini bildirgan amerikalik Bo Nikal haqida ham toʻxtalib oʻtildi. Sharabutdin bu qarama-qarshilikka tayyorligini, oʻzi rusiyalik dogʻistonlik ekanini va kurashdan qoʻrqmasligini taʼkidladi. Shuningdek, u katta nomlar sifatida Kevin Holland, Nik Dias va Konor Makgregorning ismlarini tilga olgan boʻlsa, oddiyroq raqiblar sirasiga Igor Poterya, Sedrik Dyuma va Mishel Pereyrani kiritdi.