LeBron Jeyms o'z muzeyini ochmoqda 🏛️

"Los-Anjeles Leykers" jamoasining taniqli basketbolchisi LeBron Jeyms o'zining tug'ilib o'sgan shahri Akron, Ogayo shtatida shaxsiy muzeyiga asos solmoqda. Ushbu loyiha LeBron Jeyms Oila jamg'armasi tomonidan amalga oshirilmoqda va u 25-noyabr kuni rasman ochiladi. Hozirgi vaqtda faoliyatidagi 21-mavsumini o'tkazayotgan tajribali sportchi hali professional faoliyatini yakunlamagan bo'lsa-da, o'ziga bag'ishlangan muzey ochayotgani e'tiborga molikdir.

Muzey tashrif buyuruvchilarga LeBronning qanday qilib bugungi kundagi mashhur basketbolchiga aylangani haqida hikoya qiladi. Ekspozitsiyadan sportchining uzoq yillik faoliyati davomidagi turli yutuqlari hamda noyob xotira buyumlari o'rin olgan. Jumladan, muzeyda 2003-yilgi NBA draftining butun taxtasi ham namoyish etiladi, o'shanda Jeyms birinchi raqam ostida tanlab olingan edi.

Yangi madaniy-sport maskaniga kirish narxi ham o'ziga xos tarzda belgilangan. Unga ko'ra, chipta qiymati 23 dollarni tashkil qiladi va bu narx basketbolchining NBAda ko'p yillar davomida kiyib kelgan raqamiga ramziy ma'noda mos keladi.

Lebron Jeymsning o'zi bu voqea haqida ijtimoiy tarmoqlarda munosabat bildirib, muxlislari bu yerda qurilgan ishlar va uning qayerdan boshlanganini ko'rishlarini intiqlik bilan kutayotganini yozib qoldirdi.