Xvicha "Barselona"ga o'tadimi? 🔵🔴

Rossiya terma jamoasining sobiq futbolchisi Aleksandr Mostovoy "Napoli" safida to'p surayotgan gruziyalik yarim himoyachisi Xvicha Kvaratsxeliyaning "Barselona"ga potensial o'tishi haqida o'z fikrlari bilan o'rtoqlashdi. Avvalroq matbuotda "ko'k-anorranglilar" yozgi transfer oynasida futbolchini o'z safiga qo'shib olishi mumkinligi hamda uning atrofidagilar bilan allaqachon bog'lanishgani haqida xabarlar tarqatilgandi.

Mutaxassis Kvaratsxeliya Kataloniya grandida o'zini ko'rsata olishiga va yuqori natijalarga erishishiga ishonch bildirdi. Shuningdek, sobiq futbolchi "Rubin"ning sobiq o'yinchisi tez orada aynan shu klubga ko'chib o'tishini chin dildan istashini qo'shimcha qildi.

Mostovoyning fikricha, yarim himoyachining mahorati va darajasi "Barselona" safida to'p surish uchun to'liq yetarli. Shu bilan birga, matbuotda tez-tez tilga olinayotgan 90-100 million yevro miqdoridagi transfer summasiga izoh berar ekan, bunday raqamlar qayerdan olinishini tushunish qiyinligini bildirdi.

U so'nggi yillarda futbol bozorida mantiqqa to'g'ri kelmaydigan juda ko'p yirik transferlar amalga oshirilganini eslatib o'tdi. Shu sababli ekspert transfer narxlaridagi bunday raqamlarga ortiqcha e'tibor qaratmaslik lozimligini ta'kidlab o'tdi.