Robin Ayyokkonen Red Bull jamoasiga qo'shiladi 🏎️

Formula 1 bo'yicha 2007-yilgi jahon chempioni Kimi Ayyokkonaning o'g'li Robin Ayyokkonen 2027-yildan e'tiboran Red Bull yoshlar jamoasining rivojlanish dasturiga qabul qilinadi. Shu tariqa u mazkur nufuzli dasturning navbatdagi ishtirokchisiga aylanadi.

Yosh finlyandiyalik poygachi bolaligidan karting bilan shug'ullanib kelmoqda. U milliy hamda xalqaro darajadagi Rotax va WSK chempionatlarida allaqachon sezilarli muvaffaqiyatlarga erishishga ulgurgan.

Ma'lumot uchun, uning otasi Kimi Ayyokkonen 2001-2021-yillar oralig'ida 19 mavsum davomida Formula 1 da qatnashib, 21 ta Gran-pri g'alabasi va 103 ta shohsupani qo'lga kiritgan. O'z navbatida, Red Bull yoshlar dasturi avvalroq Sebastyan Fettel va Maks Ferstappen kabi mashhur poygachilarni tarbiyalab chiqargan.

Jamoa vakili Loran Mekies yosh sportchining kartingdagi yuqori mahoratini alohida ta'kidladi. Uning so'zlariga ko'ra, Robinning tezligi va vazminligi uni o'z tengqurlari orasida yetakchi qilib ko'rsatmoqda. Rahbariyat unga ortiqcha bosim o'tkazmagan holda, zarur sharoit va vaqtni taqdim etishni maqsad qilgan.

Kimi Ayyokkonen o'g'lining bu qadamidan mamnun ekanini bildirdi. U Red Bull dasturi o'g'lining kelajagi uchun eng to'g'ri muhitni taqdim etishiga ishonch bildirdi hamda jamoa ko'rsatgan yordam uchun minnatdorlik izhor etdi.