Fil Jekson statuasi o'rnatiladi 🏀

"Los-Anjeles Leykers" basketbol klubi o'z tarixidagi eng muvaffaqiyatli murabbiylardan biri Fil Jekson sharafiga uy arenasi yaqinida maxsus haykal barpo etishini ma'lum qildi. Bu haqda klub matbuot xizmatiga tayanib TАСС agentligi xabar tarqatdi.

Tashkilotchilarning rejasiga ko'ra, mazkur yodgorlik o'rnatilib, 2027 yilning aprel oyida ommaga taqdim etiladi. Shu tariqa, Fil Jekson "Leykers" sharafini munosib himoya qilgan va o'z haykaliga ega bo'ladigan klubning to'qqizinchi vakiliga aylanadi.

Eslatib o'tamiz, bungacha klubning sobiq afsonaviy vakillaridan Medjik Jonson, Karim Abdul-Jabbar, Jerri Uest, Eldjin Beylor, Shakil O'Nil, Kobi Brayant, Chik Xirn hamda Pet Rayli ham shunday ehtiromga sazovor bo'lishgan edi.

Hozirgi kunda 80 yoshda bo'lgan Fil Jekson "Leykers" jamoasiga ikki muddatda — 1999-2004 hamda 2005-2011 yillarda ustozlik qilgan. Uning rahbarligi ostida Los-Anjeles jamoasi besh marotaba, aniqrog'i 1999, 2001, 2002, 2009 va 2010 yillarda NBA chempionligini qo'lga kiritgan.

Murabbiylik faoliyati davomida u nafaqat "Leykers", balki "Chikago" jamoasini ham olti bora (1991, 1992, 1993, 1996, 1997, 1998 yillarda) chempionlik cho'qqisiga olib chiqqan. Shuningdek, uning o'yinchi sifatidagi faoliyati ham boy bo'lib, "Nyu-York" hamda "Nyu-Jersi" safida to'p surgan va "Nyu-York" bilan ikki bor (1970, 1973 yillarda) NBA chempioni unvoniga erishgan.