Kimi Antonelli Italiya GPda zafar quchdi! 🇮🇹

Italiya Grand-prisida Kimi Antonelli yana bir ajoyib natijani qayd etib, o'z uyidagi muxlislari qarshisida chempionlik sari yana bir muhim qadam tashladi. Yaqinda o'n to'qqiz yoshni qarshi olgan yosh iqtidor egasi dvigatel bilan bog'liq jarima sababli musobaqani o'n to'qqizinchi o'rindan boshlashga majbur bo'lgan edi. Biroq bu qiyinchilik uning shiddatli harakatlariga to'sqinlik qila olmadi.

Poyga davomida raqiblarini ketma-ket ortda qoldirgan Antonelli atigi o'sakkizinchi davrga kelib peshqadamlikni qo'lga kiritdi. O'rtadagi pit-stopdan so'ng u vaqtincha oltinchi o'ringa tushib qoldi, biroq Lyuis Hemilton va Oskar Piastrini ortda qoldirib, yana yetakchilik uchun kurashga qaytdi. Poyganing so'nggi qismida esa jamoa doshi Jorj Rassel bilan kechgan keskin kurashda uning yangiroq shinalari o'z ustunligini ko'rsatdi.

Rassel oxirgi bosqichlarda shinalar eskirishi va xatolarga yo'l qo'ygani sababli Antonelliga bas kela olmadi. Marraga bir necha davr qolganda yetakchilikni qaytarib olgan Antonelli raqibidan to'rt soniyagacha farq bilan birinchi bo'lib marra chizig'ini kesib o'tdi. Ikkinchi o'rinni egallagan Rasseldan keyin shohsupaning uchinchi pog'onasiga Maks Verstappen ko'tarildi, kuchli beshlikka Lando Norris hamda Oskar Piastri yakun yasadi.

Ushbu g'alaba poygachining mavsumdagi yettinchi zafari bo'lib, uning chempionatdagi peshqadamligini yanada mustahkamladi. Oldinda hali o'nta bosqich, jumladan Ostin va Las-Vegasdagi bellashuvlar turibdi. Kelgusi hafta esa Ispaniya Grand-prisi ilk bor Barselonadan Madriddagi yangi Madring trassasiga ko'chirilib, yangi davrni boshlab beradi.