Igor Akinfeyev: Saudiya Arabistoniga ketaman ⚽

SSKA darvozaboni Igor Akinfeyev YouTube'dagi CSKA Podcast kanaliga bergan intervyusida o‘zining kelajagi va faoliyatini yakunlash ehtimoli haqida to‘xtalib o‘tdi. Hozirgi kunda uning sog‘lig‘i maydonda to‘p surishga imkon berayotgan ekan, u faoliyatini yakunlash haqida o‘ylamayotganini bildirdi. Shu bilan birga, 37 yoshli posbon besh yoshidan boshlab yiqilishlar oqibatida tizza va belida ba'zi og‘riqlar bezovta qilishini, organizm temir emasligini tan oldi.

Futbolchi to‘laqonli ravishda o‘ynamaslikka tayyor ekanini yuz foiz tushunib yetgan kuni bu haqda o‘zi e'lon qilishini ta'kidladi. SSKA bilan imzolangan amaldagi shartnoma yoz oyigacha mo‘ljallangan bo‘lib, shundan so‘ng vaziyatga qarab ish tutiladi. Agar klub unga yangi shartnoma taklif qilmasa, u hazilomuz ohacta Saudiya Arabistoniga ketishini ma'lum qildi.

Shuningdek, suhbat davomida darvozabon avvalgi intervyularidan birida o‘z faoliyatini aynan qayerda yakunlashi haqidagi savolga hazil bilan Sochida deya javob berganini eslatib o‘tdi.

Ma'lumot o‘rnida, 37 yoshli Igor Akinfeyev SSKA klubining tarbiyalanuvchisi hisoblanadi va butun professional faoliyatini faqatgina ushbu poytaxt jamoasida o‘tkazib kelmoqda. Qizil-ko‘klar safidagi amaldagi shartnomasi 2024-yilning iyun oyi oxirigacha amal qiladi.