Shelton Alkarasni US Ochiq chempionatidan chiqarib yubordi 🎾

AQSh ochiq chempionatining chorak finalida tarixiy natija qayd etildi va turnir tarixidagi eng kech yakunlangan uchrashuv guvohiga aylandi. Dunyoning 8-rakqkasi Ben Shelton ikki karra amaldagi chempion Karlos Alkarasni besh setli shiddatli kurashda taslim etdi. O‘yin 6-7, 6-1, 6-3, 1-6, 7-6 hisobida yakunlanib, hal qiluvchi tay-breyk 10-7 ko‘rinishida amerikalik tennischi foydasiga hal bo‘ldi. Bu g‘alaba Sheltonning kuchli uchlik vakillariga qarshi 18-urinishdagi ilk muvaffaqiyati hamda Alkarasga qarshi o‘tkazilgan to‘rtinchi o‘yindagi birinchi g‘alabasi bo‘ldi.

Uchrashuv yakuni mahalliy vaqt bilan tundan o‘tib, tonggi soat uchdan keyinga to‘g‘ri keldi. Beshinchi setda har ikki tennischi o‘z geymlarini saqlab qoldi va breykga yo‘l qo‘ymadi. Tay-breyk boshlanganda o‘yin allaqachon 4 soat 15 daqiq davom etgan edi. Unda Shelton dastlab ustun kelgan bo‘lsa-da, Alkaras ketma-ket ochkolar olib oldinga o‘tdi, biroq oxir-oqibat amerikalik sportchi kuchli, soatiga 146 mil tezlikdagi eys zarbasi bilan bahsni o‘z foydasiga hal qildi.

Mazkur mag‘lubiyat ispaniyalik tennischining bir qator ta’sirli seriyalariga yakun yasadi. Alkaras bu turnirda birinchi setni yutganidan keyin 25 ta uchrashuvda g‘alaba qozongan, "Katta dubulg‘a" turkumidagi musobaqalarda 18 ta o‘yindan iborat g‘alabali seriyaga ega edi va yirik turnirlarda amerikalik raqiblarga qarshi 13 ta o‘yinning barchasida zafar quchgandi. Ushbu oqshomda mazkur uchala seriya ham o‘z nihoyasiga yetdi. Shuningdek, bu ispaniyalik sportchining faoliyatidagi ikkinchi besh setli mag‘lubiyat bo‘ldi.

O‘yin davomida Alkaras o‘zini noqulay his qilgani va sochiqqa qayt qilgani ham ma’lum bo‘ldi. O‘yindan keyingi intervyusida Ben Shelton muxlislarga minnatdorchilik bildirib, Nyu-York shahrining qo‘llab-quvvatlashi unga kuch berganini ta’kidladi. Shuningdek, u stadiondagi yaqinlari va uch soatdan keyin ishga borishi kerak bo‘lgan tanishlari uchun xavotir bildirib, ularning rahbarlaridan dam olish kuni berilishini so‘radi. Yarim finalda Ben Shelton boshqa bir amerikalik tennischi Frensis Tiafega qarshi bahs olib boradi.