Aydos Sodiqovga suiqasdda gumonlanuvchi taslim bo'ldi 🚨

Ukraina poytaxti Kiyev shahrida qozog'istonlik mashhur jurnalist Aydos Sodiqovga nisbatan uyushtirilgan suiqasdda gumon qilinayotgan ikki shaxsdan biri Oltoy Jakanboyev Qozog'iston huquq-tartibot idoralariga taslim bo'ldi. Bu haqda mamlakat Bosh prokuraturasi rasman ma'lum qildi va hodisa 21-iyun kuni sodir bo'lganini tasdiqladi. Rasmiylarning bildirishicha, Jakanboyev tergov doirasida so'roq qilingan, biroq hozircha boshqa tafsilotlar oshkor etilmayapti.

Bundan bir kun oldin Ukraina rasmiylari Qozog'istonning ikki fuqarosi – Oltoy Jakanboyev hamda Meyram Qoratoyevni ushbu suiqasv ishi bo'yicha xalqaro miqyosda qidiruvga bergan edi. Tergov xulosalariga ko'ra, har ikki gumonlanuvchi joriy yilning 2-iyun kuni Polsha hududi orqali Ukrainaga yetib kelgan. Ular jurnalistning harakatlarini kuzatib borish maqsadida maxsus uy ijaraga olib, avtomobil ham xarid qilishgan.

Qurolli hujum 18-iyun kuni amalga oshirilgan bo'lib, tergov versiyasiga ko'ra, Meyram Qoratoyev jurnalistning mashinasiga yaqinlashgan va uning boshiga ovoz o'chirgichli to'pponchadan o'q uzgan. Shundan so'ng gumonlanuvchilar voqea joyidan yashirinib, Moldovaga qochib ketishgan. Qayd etilishicha, Aydos Sodiqov suiqasddan omon qolgan, biroq uning sog'lig'i og'ir ahvolda qolmoqda.

Jabrlanuvchining rafiqasi Nataliya Sodiqova ijtimoiy tarmoqlardagi sahifalarida gumonlanuvchilardan biri politsiya xodimi ekanini yozgan edi. Bunga javoban Qozog'iston Ichki ishlar vazirligi Murojaatga izoh berib, Qoratoyev 2019-yilning yanvar oyidayoq ichki ishlar organlaridan bo'shatib yuborilganini ma'lum qildi.

Ma'lumot uchun, Aydos va uning rafiqasi Nataliya bir milliondan ziyod obunachiga ega bo'lgan «Base» YouTube kanalining mualliflari hisoblanadi. Ular o'zlarining video materiallarida Qozog'iston hukumatini tanqid qilib, korrupsiya va politsiya zo'ravonligi kabi mavzularni yoritib kelishadi. Sodiqovlar oilasi 2014-yildan beri Kiyev shahrida yashab kelmoqda, 2023-yilda esa Qozog'iston IIV ularni nafrat uyg'otganlikda ayblab, qidiruvga bergandi.