🩺 Oshqozon osti bezi saratonining yashirin belgisi

Oshqozon osti bezi saratoni tibbiyotda eng xavfli va tajovuzkor o‘sma turlaridan biri sifatida e'tirof etiladi. Onkolog-ximioterapevt Vladislav Evseevning ma'lum qilishicha, ushbu xavfli kasallikning o‘ziga xos klinik belgilari mavjud bo‘lib, ularga tana vaznining 10-20 foizgacha keskin kamayishi, ozgina ovqatlangandan so‘ng ham to‘qlik hissining paydo bo‘lishi hamda teri va shilliq qavatlarning sarg‘ayishi kiradi.

Biroq kasallikning yanada xavfli va ko‘zga tashlanmaydigan yana bir belgisi borki, u ko‘pincha boshqa kasalliklar bilan adashtiriladi. Mutaxassisning tushuntirishicha, mazkur onkologik xastalikdagi og‘riqlar ko‘pincha o‘rab oluvchi xarakterga ega bo‘lib, orqa qismga tarqaladi. Natijada bemorlar haqiqiy sabab aniqlanguniga qadar uzoq vaqt davomida nevrolog shifokor ko‘rigida bo‘lib kelishadi.

O‘z navbatida, onkolog Elena Jukova xavfli o‘sma kasalliklarini keltirib chiqaruvchi xavf omillarini sanab o‘tdi. Uning so‘zlariga ko‘ra, chekish, ortiqcha vazn, noto‘g‘ri ovqatlanish, xususan qizil yoki qayta ishlangan go‘shtni ko‘p iste'mol qilish xastalik ehtimolini oshiradi. Shuningdek, gepatit V va S kabi virusli infeksiyalar, spirtli ichimliklar, irsiyat, radiatsiya va nurlanishlar ham muhim rol o‘ynaydi.

Mutaxassislar ma'lumotlariga ko‘ra, har bir onkologik kasallik turining o‘ziga xos o‘rtacha yosh ko‘rsatkichlari mavjud. Masalan, ko‘krak bezi saratoni 62 yoshda, yo‘g‘on ichak saratoni 67 yoshda, o‘pka saratoni 71 yoshda, prostata bezi saratoni esa 66 yoshda qayd etilsa, suyak saratoni 20 yoshgacha bo‘lgan davrda uchrashi mumkin.