Maks Verstappen 2025 yilda ham Red Bull'da qoladi 🏎

Formula 1 chempioni Maks Verstappen kelasi mavsumda ham "Red Bull" jamoasi safida qolishini ma'lum qildi. Bu haqda u Avstriya Gran-prisi oldidan bergan intervyusida yana bir bor oydinlik kiritdi. Uning so'zlariga ko'ra, jamoa hozirning o'zida kelgusi yilgi bolid ustida qizg'in ish olib bormoqda va bunday e'tibor uning aynan shu jamoada poyga qilishidan darak beradi.

Amaldagi shartnomasi 2028 yil yakunigacha mo'ljallanganiga qaramay, mavsum boshida yuzaga kelgan ichki ziddiyatlar va "Mercedes" rahbariyatining faol qiziqishi sababli niderlandiyalik poygachining kelajagi haqida turli xil taxminlar tarqalgan edi. Xususan, o'tgan haftadagi Ispaniya Gran-prisi vaqtida "Mercedes-Benz" rahbari Ola Kallenius Verstappenni kumush rangli bolidda ko'rishni istashini aytib o'tgan edi. Shunga qaramay, jamoa rahbari Toto Volf uch karra jahon chempioni bilan hozirda hech qanday muzokaralar o'tkazilmayotganini ta'kidladi.

"Red Bull" rahbari Kristian Xorner ham o'z navbatida Maksning jamoani tark etmasligini bir necha bor ta'kidlagan. Jurnalistlar Verstappenning o'zidan bu mish-mishlarga 2025 yilda qolishini aniq tasdiqlash orqali chek qo'yishni so'rashganida, u jamoa kelajagi uchun raqobatbardosh mashina ustida ishlayotganini va bu yetarli javob ekanini bildirdi.

Ayni paytda shaxsiy chempionatda 69 ochkoli farq bilan peshqadamlik qilayotgan poygachi mavsum oxirida mashina eng tezkor bo'lmasa ham jamoadan ketmasligini qayd etdi. U Formula 1 shunchaki shartnomani bir lahzada bekor qilib ketib qoladigan sport emasligini, hozirgi jamoasidan mamnunligini va kelgusi yilgi mavsumga qattiq tayyorgarlik ko'rayotganini qo'shimcha qildi.