Minnesota Timberwolves Sasha Vezenkovga qiziqdi 🏀

"Minnesota Timberwolves" jamoasi erkin agent Jonatan Kuminga bilan kelishuvga erishguniga qadar hujumchi Sasha Vezenkovni AQShga qaytarish variantini o'rganib chiqqan edi. Bu haqda liga manbalariga tayanib xabar berildi.

Hozirda 31 yoshni qarshi olgan Vezenkov 2023 yilda "Olimpiakos" safida Yevroliganing eng yaxshi o'yinchisi deb topilgach, "Sakramento Kings" bilan shartnoma imzolagan edi. Biroq u yangi jamoasida u qadar katta rol o'ynamadi va 42 ta uchrashuvda o'rtacha 5.4 ochko hamda 2.3 ta ribaund qayd etdi.

2024 yilgi mavsum oralig'ida "Toronto Raptors"ga almashtirilgan basketbolchi NBA bilan tuzgan shartnomasini bekor qilib, 6.7 million dollarlik kafolatlangan maoshidan voz kechdi va Gretsiyaga qaytdi. U yerda yana "Olimpiakos" sharafini himoya qila boshlagan tajribali hujumchi o'zining avvalgi yuqori darajasini tikladi.

O'tgan mavsumda u Yevroligada chempionlikni qo'lga kiritib, yana MVP unvoniga sazovor bo'ldi va to'rtinchi bor ramziy terma jamoaga kiritildi. Vezenkov NBAga qaytish ehtimolini butunlay inkor etmasa-da, hozircha bu uning asosiy ustuvor maqsadi emasligini bildirdi.

Jurnalist Shteynning ma'lumotiga ko'ra, "Timberwolves" bu yozda basketbolchiga hech qanday rasmiy shartnoma taklif qilmagan. Klub uning qiziqishi yo'qligini sezgani uchun shunday yo'l tutdimi yoki Vezenkovni Kuminga olinmagan taqdirda zaxira varianti sifatida ko'rdimi, hozircha noma'lumligicha qolmoqda.

Shuningdek, Vezenkovning "Olimpiakos" bilan 2028/29 yilgi mavsum oxirigacha amal qiladigan shartnomasi borligi bois, agar tomonlarda o'zaro qiziqish bo'lgan taqdirda ham shartnomani muddatidan oldin bekor qilish qiyin kechishi mumkin edi. Kuminga bilan kelishuvga erishilgach, Minnesota klubi o'z tarkibidagi standart shartnomali o'yinchilar sonini 14 nafarga yetkazdi.