Toni Kroos "Real" haqida nima dedi? 🏆

Madridning «Real» klubining sobiq yarim himoyachisi Toni Kroos Ispaniya chempionatining joriy mavsumdagi g'olibi va sovrindorlari borasida o'z fikrlari bilan o'rtoqlashdi. U «Einfach mal Luppen» podkastida ishtirok etib, mavsum yakunida qaysi jamoalar yuqori o'rinlarni egallashini taxmin qilgan.

Toni Kroosning so'zlariga ko'ra, uning sobiq jamoasi «Real Madrid» bu mavsumda ham chempionlikni qo'lga kiritishiga hech qanday shubha yo'q. Germaniyalik sobiq futbolchi bu borada o'zining qat'iy ishonchini bildirgan.

Shu bilan birga, Kroos ikkinchi o'rin uchun kechadigan bahsda «Atletiko» «Barselona»ni ortda qoldirib, turnir jadvalida yuqoriroq pog'onani band etishini taxmin qilgan. U «ko'k-anorranglilar»ning imkoniyatlariga nisbatan skeptik munosabatda ekanini ko'rsatgan.

Ma'lumot o'rnida eslatib o'tamiz, Ispaniya La Ligasining o'tgan mavsumida «Real Madrid» chempionlik unvonini qo'lga kiritgan edi. O'shanda Xavi boshchiligidagi «Barselona» mavsumni ikkinchi o'rinda yakunlagandi.