Shon Kombsning advokati tintuvlarni qoraladi ⚖️

Amerikalik mashhur rapchi va musiqa magnati Shon "Diddy" Kombsning advokati huquq-tartibot idoralarining uning uy-joylarida o'tkazgan reydlarini keskin qoralab chiqdi. U bu harakatni aybsiz insonga nisbatan harbiy darajadagi kuchning haddan tashqari qo'pol ishlatilishi deb atadi.

Dushanba kuni AQSh Ichki xavfsizlik xizmatining agentlari Nyu-Yorkdagi federal idoralar olib borayotgan tergov доirasida 54 yoshli artistning Los-Anjeles va Mayamidagi uylarida tintuv o'tkazdi. Bu jarayon so'nggi oylarda san'atkorga qarshi qo'zg'atilgan bir nechta jinsiy zo'ravonlik va shubhali da'volar ortidan amalga oshirildi.

Artistning advokati Aaron Dyer tarqatgan bayonotda qayd etilishicha, tintuv vaqtida xodimlar hamda bolalarga nisbatan ko'rsatilgan dushmanlik va kuch ishlatish holatlarini oqlab bo'lmaydi. Shon Kombsning o'zi hibsga olinmagan, biroq rasmiylar bilan muloqot qilib, tergovga ko'maklashgan. OAVdagi turli xabarlarga qaramay, xonanda va uning oila a'zolariga nisbatan hech qanday cheklovlar qo'yilmagan hamda ular hibsga olinmagan.

Himoyachining fikricha, bunday kutilmagan bosqin va ommaviy axborot vositalarining oldindan xabardor qilingani jamoatchilikda muddatidan oldin noto'g'ri xulosa chiqarilishiga olib keladi. U mazkur holatni asossiz fuqarolik da'volariga tayanilgan "ov" deb baholadi. Hozircha hech qanday jinoiy yoki fuqarolik javobgarligi tasdiqlangani yo'q va Kombs o'z nomini oqlash uchun kurashishda davom etadi.

Rasmiylar tintuv sabablarini rasman e'lon qilmagan bo'lsa-da, Amerika OAVlari bu Nyu-Yorkdagi federal organlar olib borayotgan odam savdosi bo'yicha tergov bilan bog'liqligini yozmoqda. Eslatib o'tamiz, avvalroq qo'shiqchi Kessi va boshqa da'vogarlar artistga nisbatan og'ir ayblovlar bilan sudga murojaat qilgan edi. Shon Kombs va uning huquqshunoslari barcha ayblovlarni mutlaqo rad etib kelmoqda.