Samsungdan Apple’ning ilk buklama telefoniga maslahat 📱

Samsung kompaniyasi yillar davomida buklama qurilmalar bozorini rivojlantirib, ushbu yo‘nalishdagi eng ilg‘or gadjetlarni taqdim etib kelmoqda. Yaqin orada esa Apple o‘zining ilk buklama iPhone smartfoni bilan mazkur bozorga kirishga tayyorlanmoqda. Shu munosabat bilan Samsung mutaxassislari Wired nashriga bergan intervyusida raqobatchining kelajakdagi qadamiga o‘z munosabatini bildirdi.

Samsung kompaniyasining ilg‘or mexanik tadqiqotlar guruhi rahbari Xi-Chul Mun hamda smartfonlar tadqiqotlar guruhi rahbari Seungki Choyning ta’kidlashicha, Apple’ning buklama segmentiga kirishi kompaniya tomonidan to‘liq qo‘llab-quvvatlanadi. Ularning fikricha, bu holat mazkur bozorga yanada ko‘proq e’tibor qaratilishiga va uning nufuzi oshishiga xizmat qiladi. Shuningdek, boshqa yirik brendlarning kirib kelishi Samsung o‘z vaqtida asos solgan buklama toifa qiymati tan olinayotganidan dalolat beradi.

Mutaxassislarning asosiy e’tibor qaratayotgan jihatlaridan biri bu qurilmaning vazni hisoblanadi. Munning so‘zlariga ko‘ra, ushbu bozorda eng yuqori mijozlar qiymatini taqdim etishning kaliti bu – qurilmaning vaznidir. Yillar davomida qilingan sa’y-harakatlar evaziga Samsung o‘z buklama telefonlarining og‘irligini sezilarli darajada kamaytirishga muvaffaq bo‘ldi. Masalan, Galaxy Z Fold 8 atigi 201 gramm og‘irlikka ega bo‘lib, hatto odatiy flagman smartfonlardan ham yengilroq chiqdi.

Taqqoslash uchun, Galaxy S26 Ultra og‘irligi 214 grammni tashkil etadi. Shu bilan birga, Apple kompaniyasining kutilayotgan ilk buklama smartfoni og‘irligi taxminan 230–241 gramm atrofida bo‘lishi taxmin qilinmoqda. Dastlabki ma’lumotlarga ko‘ra, "iPhone Duo" deb nomlanishi kutilayotgan Apple qurilmasi Galaxy Z Fold 8 bilan bir xil asosiy shakl faktoriga ega bo‘ladi. Garchi Android tizimi bu bozorda katta ustunlikka ega bo‘lsa-da, Apple tez orada asosiy o‘yinchilardan biriga aylanishi kutilmoqda.