Hindistonda raqamli obligatsiyalar ishga tushdi 🇮🇳

Hindiston moliyaviy bozori raqamli aktivlar yo'nalishida muhim qadam tashlab, korporativ obligatsiyalarni tokenizatsiya qilish jarayonini yo'lga qo'ydi. Ushbu raqamli obligatsiyalar odatdagi qog'oz qimmatli qog'ozlar kabi belgilangan stavka, amal qilish muddati va kupon to'lovlariga ega bo'lib, ular mamlakatning raqamli milliy valyutasi bilan uzviy bog'langan.

Mamlakat Markaziy bankining tushuntirishicha, maxsus Demat 2.0 mexanizmi tokenlar reyestrini Hindiston regulyatorining yagona bozor interfeysi orqali raqamli rupiy bilan bog'laydi. Mazkur sxema bitim qatnashchilaridan biri o'z majburiyatini bajarib, ikkinchisi bajarmay qolishi xavfini sezilarli darajada kamaytirishga xizmat qiladi. Shuningdek, kelgusida smart-kontraktlar vositasida kupon to'lovlari hamda qimmatli qog'ozlarni qoplash jarayonlarini to'liq avtomatlashtirish va'da qilinmoqda.

Sinov tariqasidagi ushbu loyihaning dastlabki bosqichida yirik davlat energokreditori REC birinchilardan bo'lib tokenizatsiyalashgan qog'ozlarni chiqardi va mazkur tizim orqali taxminan 56 million dollar mablag' jalb qilishga muvaffaq bo'ldi. Uning ortidan Larsen & Toubro qurilish korporatsiyasi 5,3 million dollarlik raqamli qog'ozlarga ega bo'ldi, IIFL Finance moliyaviy tashkiloti esa qariyb 2,8 million dollar mablag' yig'di. Sinov jarayonining keyingi bosqichlarida ikkilamchi savdolarni yo'lga qo'yish hamda chakana investorlarni ham ushbu bozorga kiritish ko'zda tutilgan.

Qayd etish joizki, bungacha iyun oyi oxirida Hindiston rasmiylari kriptovalyuta to'lovlari bilan shug'ullanuvchi kompaniyalarga nisbatan qattiq reydlar o'tkazgan edi. O'shanda mamlakat Huquqni muhofaza qilish boshqarmasi beshta kompaniya ruxsatsiz transchegaraviy o'tkazmalarni amalga oshirib, chet elga 265 million dollardan ortiq mablag' jo'natganini ma'lum qilgan edi. Natijada norezidentlar bank o'tkazmalari o'rniga foydalanadigan USDT steyblkoinlari uchun Hindistonda o'rtacha 8,5 foizgacha ortiqcha haq to'lana boshlangan edi.