🇰🇽 KXDR harbiylari Kurskda ruslarni o‘qqa tutdi

Ukraina harbiy razvedkasining tarqatgan maʼlumotlariga ko‘ra, Rossiyaning Kursk viloyatida Shimoliy Koreya askarlari tomonidan jiddiy hodisa sodir etilgan. Maʼlum bo‘lishicha, KXDR harbiylari jangovar hududda yo‘nalishni noto‘g‘ri aniqlab, Chechenistonning Axmat bo‘linmasiga tegishli avtomobilni o‘qqa tutib yuborgan.

Ushbu noxush holat oqibatida sakkiz nafar rossiyalik harbiy xizmatchi halok bo‘lgan. Ukraina tomonining taʼkidlashicha, mazkur fojiaga Shimoliy Koreya qo‘shinlarining jang maydonida til to‘siqlari va o‘zaro tushunmovchiliklarga duch kelayotgani asosiy sabab qilib ko‘rsatilmoqda.

Hozirgi kunda Rossiya hududida KXDRning 11 mingga yaqin harbiysi borligi qayd etilmoqda. Shu sababli Rossiya hukumati ularning joylashuvi hududlarida maxsus kontrrazvedka rejimini joriy etishga majbur bo‘lgan.

Ushbu zonalarga kirish uchun Rossiya armiyasining oddiy askarlari va zobitlari Federal xavfsizlik xizmati xodimlari tomonidan qattiq tekshiruvdan o‘tkazilmoqda. Xususan, hududga kiruvchilarning telefonlari hamda boshqa aloqa qurilmalari vaqtincha olib qo‘yilayotgani aytilmoqda.