Qashqadaryo sharoiti tanqid qilindi 🗺️

Prezident Shavkat Mirziyoyev o‘zining Qashqadaryo viloyatiga uyushtirgan amaliy tashrifini yangidan tashkil etilgan Ko‘kdala tumanidan boshladi. Ushbu hududdagi to‘qimachilik klasterida viloyat faollari bilan uchrashuv o‘tkazilib, kelgusidagi ulkan rejalar muhokama qilindi. Davlat rahbari o‘z nutqida bugungi zamon shiddati va tahlikali davr haqida to‘xtalib o‘tdi.

Shu bilan birga, Qashqadaryoning mard va tanti xalqi borligiga qaramay, yashash sharoitlari bo‘yicha viloyat boshqa hududlardan ortda qolayotgani ochiq tanqid qilindi. Ta’kidlanishicha, boy yer osti boyliklari va buyuk sarkardalar vatani bo‘lgan bu o‘lkada aholining bugungi sharoitda yashashi adolatsizlikdir.

Aholining turmush darajasini oshirish va ularni rozi qilish mashaqqatli mehnat talab etishi bildirildi. Prezident viloyatni rivojlantirish uchun katta mablag‘ olib kelganini, biroq mablag‘ topish oson emasligini eslatdi. Ajratilgan mablag‘lar xalq manfaatiga xizmat qilishi uchun har bir qadamni aql bilan tashlab, metin intizomga amal qilish shartligi uqtirildi.