O‘zbekiston delegatsiyasi Xitoyda 🇨🇳

Milliy Olimpiya qo‘mitasi bosh kotibi Oybek Kasimov va qo‘mita raisi o‘rinbosari Azizjon Kamilov boshchiligidagi O‘zbekiston delegatsiyasi Xitoy Xalq Respublikasiga ishchi tashrif bilan bordi. «Dunyo» axborot agentligi tarqatgan ma'lumotlarga ko‘ra, safarning dastlabki manzili sifatida jahon sportining yirik namunalaridan biri sanalgan Pekin Milliy konki uchish markazi tanlandi. Qishki Olimpiya o‘yinlari uchun qad rostlagan ushbu inshootda mahalliy mutaxassislar mamlakatda sport obyektlarini barpo etishdagi so‘nggi yutuqlar haqida atroflicha ma'lumot berdilar.

Tashrif doirasida rasmiylar "Tashkent-2025" yoshlar Osiyo o‘yinlari loyihasini qurish ishlariga mas'ul bo‘lgan "China CAMC Engineering" kompaniyasi rahbariyati bilan muzokaralar o‘tkazdi. Tashkilot bosh direktori Li Xaysin bilan muloqot chog‘ida Olimpiya shaharchasidagi qurilish jarayonlari hamda kelgusidagi hamkorlik yo‘nalishlari muhokama qilindi.

Shuningdek, delegatsiya a'zolari Pekindagi CNSG kompaniyasi ofisida bo‘lib, mazkur tashkilot rahbarlari bilan uchrashdilar. Kompaniya bo‘lajak musobaqalarni tashkiliy hamda ma'muriy jihatdan o‘tkazishda o‘z xizmatlarini taklif qildi. Ikki tomonlama uchrashuvlarda kelgusidagi rejalar yuzasidan o‘zaro fikr almashilib, hamkorlikning yangi jihatlari ko‘rib chiqildi.

Hozirda O‘zbekiston delegatsiyasining Xitoy bo‘ylab amaliy tashrifi davom etmoqda. Rasmiy vakillar navbatdagi manzil sifatida yaqinda Butunjahon yozgi Universiadasiga mezbonlik qilgan Chendu shahriga yo‘l olib, u yerdagi sport infratuzilmasini yaqindan o‘rganmoqdalar.