Fan ID’ni "Migrant ID"ga almashtirish taklif qilindi 🇷🇺

Rossiya Davlat Dumasi vise-spikeri va 2024-yilgi prezidentlik saylovlarida o‘z nomzodini qo‘ygan Vladislav Davankov mamlakatdagi "fan ID" (muxlis pasporti) tizimi bo‘yicha o‘z fikrlarini bildirib o‘tdi. Siyosatchi ushbu bahsli tizimni butunlay bekor qilish tashabbusi bilan chiqdi.

Uning ta’kidlashicha, jamiyatda bu tizimning mavjudligi va unga sarflanayotgan xarajatlar nima uchun davom etayotgani tushunarsiz bo‘lib qolmoqda. Davankov stadionlar Rossiyadagi eng xavfli maskanlar qatoriga kirmasligini va bu boradagi xavotirlar asossiz ekanini qayd etdi.

Shu bilan birga, deputat haqiqiy xavfsizlik masalalari yirik shaharlarning chekka va yotoq tumanlarida yuzaga kelayotganini bildirdi. Uning so‘zlariga ko‘ra, ayrim hududlarda aholi ko‘payib borayotgan migrantlar oqimi sababli farzandlarini ko‘chaga chiqarishdan qo‘rqib qolgan.

Shu munosabat bilan siyosatchi mavjud moliyaviy mablag‘larni boshqa sohaga yo‘naltirish vaqti kelganini ta’kidladi. Davankov "fan ID"ga ketayotgan mablag‘larni tejamagan holda, uning o‘rniga "Migrant ID" tizimini joriy etish taklifini ijtimoiy tarmoqlardagi sahifalarida e’lon qildi.