🎮 Intel yangi drayverini chiqardi

Intel kompaniyasi o'zining grafik drayverlari uchun navbatdagi yangi dasturiy ta'minot paketini chiqarishdi. Garchi shu oyning 13 va 14-kunlarida ham yangilanishlar taqdim etilgan bo'lsa-da, bugun 31.0.101.522 WHQL raqamli yangi versiya e'lon qilindi. Ushbu reliz bir qator yangi videoo'yinlar uchun maxsus moslashuvlarni hamda ilgari chiqarilgan loyihalar uchun muhim yangilanishlarni o'z ichiga oladi.

Jumladan, mazkur drayver orqali foydalanuvchilar Senua’s Saga: Hellblade II, Wuthering Waves va XDefiant loyihalarini to'laqonli qo'llab-quvvatlash imkoniyatiga ega bo'lishadilar. Shu bilan birga, mashhur Starfield o'yinining may oyi yangilanishi uchun ham maxsus ko'mak qo'shildi.

Starfield o'yini bo'yicha maxsus unumdorlik o'sishi ham qayd etilgan. Endilikda Intel Arc diskret grafik kartalari yoki protsessorlarga o'rnatilgan integratsiyalashgan grafikalar yordamida o'ynaganda, oldingi barqaror versiyaga nisbatan 1080p piksellar sonida 8% gacha va 1440p da 7% gacha ko'proq kadrlar chastotasini (FPS) qo'lga kiritish mumkin.

Bundan tashqari, yangilanish davomida ma'lum xatoliklar ham bartaraf etildi. Xususan, Intel Core Ultra protsessorlari va Intel Arc integratsiyalashgan grafikalariga ega noutbuklarda Arc Control orqali virtual kamera hamda uning oldindan ko'rish funksiyasini yoqishga urinish vaqtida yuzaga keladigan xatolik tuzatildi. Dasturiy ta'minot paketida kelgusidagi versiyalarda hal qilinishi rejalashtirilgan ma'lum muammolar ro'yxati ham keltirib o'tilgan.

Foydalanuvchilar ushbu eng so'nggi drayverni Intel Arc Control dasturiy ta'minoti orqali yoki ishlab chiqaruvchining rasmiy veb-saytidan to'liq paketni yuklab olish yo'li bilan o'rnatishlari mumkin.