Xitoy Tinch okeaniga qit'alararo raketa uchirdi 🚀

Xitoy rasmiylari Tinch okeaniga qit'alararo ballistik raketa uchirilganini tasdiqladi. Ushbu sinov oxirgi o'n yilliklardagi ilk bunday holat ekani mutaxassislar tomonidan ta'kidlandi. Raketa o'quv mashg'ulotlari doirasida o'quv jangovar kallagi bilan Tinch okeanining ochiq suvlariga yo'naltirilib, belgilangan hududga kelib tushgan.

Mazkur harbiy harakat mintaqadagi qo'shni davlatlarning keskin e'tiroziga sabab bo'ldi. Xususan, Yaponiya hukumati Pekin tomonidan oldindan ogohlantirish berilmaganini ma'lum qilib, Xitoyning harbiy qudratini oshirib borayotganidan jiddiy xavotirda ekanini bildirdi. Shuningdek, Avstraliya va Yangi Zelandiya ham yuz bergan holat yuzasidan tushuntirish va izoh talab qilishdi.

Pentagonning oldingi hisobotlariga ko'ra, Xitoy o'zining yadroviy salohiyatini AQSh prognozlaridan ham tezroq kengaytirib bormoqda. May oyidagi ma'lumotlarga ko'ra, mamlakat 500 dan ortiq operativ yadroviy kallaklarga ega bo'lib, 2030 yilga borib bu ko'rsatkich 1000 tadan oshishi kutilmoqda.

Tayvan Mudofaa vazirligi ham o'z navbatida orol atrofida Xitoyning ko'plab harbiy samolyotlari va dronlari faollashganini qayd etdi. Tayvan bunga javoban o'shbu harakatlarni kuzatish uchun o'z havo va dengiz kuchlarini safarbar etganini bildirdi.