Toshkentda YPX xodimini mashina urib ketdi 🚗

Toshkent shahrida yuz bergan yo‘l-transport hodisasi yuzasidan rasmiy idoralar qo‘shimcha ma’lumotlarni e’lon qildi. Avvalroq poytaxtdagi chorrahalarning birida xizmat vazifasini bajarayotgan YPX xodimi avtomashina tomonidan urib ketilgani haqida xabarlar tarqalgan edi.

Mazkur ko‘ngilsiz hodisa 20 aprel kuni soat 10:40 larda poytaxtimizning Mirzo Ulug‘bek tumanida ro‘y berdi. Abdulla Qodiriy va Mahatma Gandi ko‘chalari kesishgan chorrahada o‘z xizmat vazifasini o‘tayotgan Toshkent shahar IIBB YHXB YPX inspektori Farhod Sayxamatov fuqaro A.T. boshqaruvidagi Hyundai Sonata rusumli avtomashina ostida qoldi.

YHX xizmatining ma’lum qilishicha, ushbu holat haydovchining e’tiborsizligi oqibatida kelib chiqqan. Haydovchining so‘zlariga ko‘ra, u harakatlanib kelayotgan vaqtda mazkur chorrahada avvalroq sodir bo‘lgan to‘qnashuv ishtirokchilariga YPX xodimi yordam ko‘rsatayotgan bo‘lgan. Oqibatda ehtiyotsizlik tufayli mashinaning orqa chap g‘ildiragi xodimning oyoqlarini bosib o‘tgan.

YTH oqibatida tan jarohati olgan YPX xodimi voqea joyida qolib ketmagan. Hyundai haydovchisining o‘zi uni shifoxonaga olib borib, zarur birinchi yordam ko‘rsatilishini ta’minlagan.

Sodir etilgan mazkur voqea yuzasidan mas’ul xodimlar tomonidan barcha zarur hujjatlar rasmiylashtirilib, tegishli chora-tadbirlar ko‘rildi.