📱 iPhone Ultra taqchilligi yuzaga kelishi mumkin

Apple kompaniyasining yaqinlashib kelayotgan taqdimotida e'lon qilinishi kutilayotgan ilk buklama smartfoni iPhone Ultra savdoga chiqqan ilk davrda jiddiy taqchillikka uchrashi mumkinligi haqida xabarlar tarqaldi. Nikkei Asia nashri ma'lumotlariga ko'ra, kompaniya o'ta qattiq sifat nazorati talablari va murakkab texnik jarayonlar tufayli hozirda har kuni bor-yo'g'i bir necha yuz dona shunday qurilma ishlab chiqarishga erishmoqda.

Mutaxassislar va boshqa manbalarning ta'kidlashicha, asosiy muammo buklama qurilmaning ilgak qismini yasashdagi qiyinchiliklar bilan bog'liq. Shu bilan birga, OLED-info xabarlariga ko'ra, Samsung kompaniyasi 2026 yil oxirigacha ushbu telefon uchun uch millionta ekran yetkazib berishni rejalashtirgan. Bu esa Apple kelgusida ishlab chiqarish sur'atlari yaxshilanishidan umidvor ekanini bildiradi.

Shunga qaramay, hozirgi past ishlab chiqarish sur'atlari tufayli smartfon taqdim etilgan taqdirda ham unga buyurtma berish vaqti kechiktirilishi yoki xaridorlar o'z qurilmasini olish uchun oylar davomida kutishiga to'g'ri kelishi mumkin. Bunday kechikishlar kompaniya buklama texnologiyasini yaratishda uzoq vaqt davomida turli qiyinchiliklarga duch kelganidan dalolat beradi.

Agar ishlab chiqarish tezligi tez orada oshmasa, buklama qismlarga ega bo'lmagan odatiy flagman modellarni afzal ko'radigan foydalanuvchilar uchun iPhone 18 Pro yoki iPhone 18 Pro Max kabi muqobil variantlar qulayroq tanlov bo'lib qolishi mumkin.