16 yoshli o'smir o'z onasini o'ldirdi 🚨

Toshkent viloyatida sodir bo'lgan og'ir jinoyat yuzasidan Bosh prokuratura matbuot xizmati rasmiy ma'lumot tarqatdi. Unga ko'ra, voyaga yetmagan shaxs o'z onasini sheriklari bilan til biriktirib qasddan o'ldirgan va jinoyat izlarini yashirishga harakat qilgan.

Hodisa joriy yilning 31-iyul kuni kechki soat 21:00 lar atrofida yuzaga kelgan. Ma'lum bo'lishicha, 2006 yilda tug'ilgan o'smir va uning oilasida kelishmovchilik kelib chiqqan. Shundan so'ng u o'z uyida onasiga qarshi qasodli niyatini amalga oshirish uchun ikkita voyaga yetmagan tanishini yordam berish maqsadida chaqirtirgan.

O'smir va uning jinoyatdagi sheriklari ayolni qasddan o'ldirishgan. Jinoyat izlarini yashirish uchun esa marhumaning jasadini yashash uyining yerto'lasiga yashirincha ko'mib yuborishgan.

Mazkur fojiali holat bo'yicha huquqni muhofaza qiluvchi idoralar tomonidan darhol choralar ko'rildi. Xususan, Jinoyat kodeksining 97-moddasi 1-qismi ya'ni qasddan odam o'ldirish alomatlari bilan jinoyat ishi qo'zg'atildi. Hozirgi vaqtda barcha gumondor shaxslar protsessual tartibda qo'lga olingan bo'lib, tergov harakatlari olib borilmoqda.