MetaMask mustaqil kompaniyaga aylanadi 🦊

Consensys Software Inc. kompaniyasi joriy yilning 9-sentabr kuni o'zining iste'molchi va institutsional yo'nalishlarini ikkita alohida va mustaqil ishlaydigan korxonaga ajratish niyatida ekanligini ma'lum qildi. Ushbu korporativ qayta tashkil etish jarayoni 2026-yil yakuniga qadar to'liq yakunlanishi kutilmoqda.

Rejaga ko'ra, mavjud yuridik shaxs MetaMask brendi ostida qayta nomlanadi va iste'molchilar uchun mo'ljallangan moliyaviy mahsulotlarga ixtisoslashadi. Jo Lubin ushbu yangi mustaqil MetaMask kompaniyasiga rahbarlik qiladi. Ayni paytda, Linea, Besu va Teku kabi tarmoq protokollari hamda institutsional blokcheyn infratuzilmasi biznesi yangi tashkil etilgan Consensys kompaniyasi tarkibida qoladi.

Yangi Consensys kompaniyasiga Mayk Kriak bosh direktor sifatida rahbarlik qilsa, Devid Kanningem prezident lavozimini egallaydi. Shuningdek, Jo Lubin yangi tashkil etilgan Consensys kompaniyasining ijrochi raisi lavozimini ham egallashi ma'lum qilindi. Yangi tuzilma tokenizatsiya, barqaror tangalar, dasturlashtiriladigan hisob-kitoblar va institutsional mijozaar uchun xususiy blokcheyn infratuzilmasiga e'tibor qaratadi.

MetaMask o'z navbatida oddiy hamyon va token ayirboshlash xizmatlaridan tashqari to'lovlar, jamg'armalar, savdo va an'anaviy moliyaviy vositalarga kirish imkoniyatlarini kengaytirishni maqsad qilgan. Kompaniya ma'lumotlariga ko'ra, MetaMask shu kungacha 190 ga yaqin mamlakatda 100 milliondan ortiq marta yuklab olingan va trillionlab dollarlik umumiy tranzaksiya hajmiga erishgan. Shu bilan birga, tomonlar ushbu ajralish jarayonining moliyaviy ko'rsatkichlari, daromadlari yoki xodimlar soniga oid tafsilotlarni oshkor etmadi.