Binance fond optsiyalarini ishga tushirdi 📈

Dunyodagi yetakchi kriptovalyuta birjasi bo‘lgan Binance o‘z mijozlari uchun an’anaviy moliya bozoriga yo‘l ochib, AQSh fond birjasidagi aksiyalar va fondlarga asoslangan optsiya shartnomalarini joriy qildi. Ushbu yangi xizmat foydalanuvchilarga belgilangan muddatda va aniq narxda asosiy aksiyalarni sotib olish yoki sotish huquqini taqdim etuvchi jismoniy hisob-kitob qilinadigan vositalarni o‘z ichiga oladi.

Kompaniyaning bayonotiga ko‘ra, mazkur qadam an’anaviy moliya mahsulotlari qatorini kengaytirishga qaratilgan bo‘lib, treyderlarga bitta yagona akkaunt orqali bozor yo‘nalishini aniqlash, aksiyalar pozitsiyalarini sug‘urtalash va investitsiya xatarlarini boshqarish imkonini beradi.

Binance birjasi savdo bo‘limi rahbari Shunyet Jan Bloomberg nashriga bergan intervyusida kriptovalyuta infratuzilmasidan an’anaviy moliya aktivlari uchun foydalanish juda ommalashgani va o‘zini oqlayotganini qayd etdi. Uning so‘zlariga ko‘ra, birja shunchaki foydalanuvchilar talabini qondirib, ularga kengroq tanlov taqdim etmoqda.

Kompaniya taqdim etgan ma’lumotlarga tayanilsa, yanvar oyidagi 30 milliard dollarlik ko‘rsatkich iyul oyiga kelib taxminan 445 milliard dollarga yetgan. Bu an’anaviy aktivlarga bog‘langan abadiy fyucherslar savdo hajmining keskin oshganini ko‘rsatadi. Garchi ko‘pchilik chakana treyderlar uchun abadiy fyucherslarni tushunish osonroq deb hisoblasa-da, optsiyalar tugash sanasining mavjudligi va likvidatsiya xavfining yo‘qligi kabi o‘ziga xos afzalliklarga ega.

Shu bilan birga, dunyoning yirik banklari, jumladan Citi, Goldman Sachs, Wells Fargo, MUFG va Deutsche Bank stablekoinlarga ixtisoslashgan yangi qo‘shma korxona tuzishga kirishgani ma’lum bo‘ldi. Mutaxassislarning fikricha, banklar tokenlashtirilgan depozitlar va stablekoinlarning ikkalasini ham rivojlantirib, dasturlashtiriladigan raqamli pul portfelini shakllantirmoqda.