Epic Games Store blokcheyn oʻyinlarini qaytardi 🎮

Epic Games kompaniyasi oʻzining raqamli doʻkoni kontent siyosatiga oʻzgartirishlar kiritdi va buning natijasida mashhur Gods Unchained NFT karta oʻyini platformaga qayta qoʻshildi. Bu haqda seshanba kuni eʼlon qilindi.

Avvalroq Gods Unchained hamda Striker Manager 3 kabi boshqa blokcheyn oʻyinlari Entertainment Software Rating Board (ESRB) reyting agentligi tomonidan “Faqat kattalar uchun” (AO) degan bahoga loyiq koʻrilgani sababli Epic Games Storeʼdan olib tashlangan edi. Siyosat oʻzgarishidan oldin esa ushbu doʻkonda AO darajasidagi hech qanday oʻyinga ruxsat berilmagan edi.

Epic Games vakilining tushuntirishicha, ayrim blokcheyn oʻyinlari aynan shu texnologiyaning qoʻllanishi tufayli reyting tashkilotlaridan AO yosh chegarasini olmoqda. Shuning uchun kompaniya kontent qoidalarini yangilab, faqat blokcheyn yoki NFT sababli AO bahosini olgan oʻyinlarga doʻkondan joy olishiga imkon yaratdi.

ESRB reyting tizimi oʻyinlar real pul mukofotlari, qiymatga ega sovgʻalar yoki kriptovalyuta taqdim etishini, shuningdek bunday mukofotlar uchun naqd pul sarflanishini baholaydi. Odatda eng qattiq cheklovchi hisoblangan AO reytingi kuchli zoʻravonlik yoki ochiq sahnali mavzudagi oʻyinlarga beriladi va Xbox hamda PlayStation bunday loyihalarni oʻz platformalariga kiritmaydi.

Shu tariqa, oʻyin yaratuvchilar duch kelgan murakkab holat oʻz yechimini topdi. Chunki Epic Games blokcheyn loyihalarini qoʻllab-quvvatlasa-da, ilgari AO darajasidagi oʻyinlarni qabul qilmas edi. Shu bilan birga, kompaniya porno, qimor va nafrat uygʻotuvchi kontentga qarshi cheklovlar oʻz kuchida qolishini alohida taʼkidladi.