Binance Qozog‘istonda mintaqaviy markaz ochadi 🇰🇿

Dunyodagi eng yirik kriptovalyuta savdo maydonchasi bo‘lgan Binance Markaziy Osiyo va Sharqiy Yevropa hududlari uchun mo‘ljallangan xalqaro hisob-kitoblar markazini Qozog‘istonda ochishni rejalashtirmoqda. Ushbu tashabbus birjaning mazkur davlat markaziy banki bilan yaqinda imzolagan o‘zaro anglashuv memorandumi doirasida amalga oshirilmoqda.

Qozog‘iston Milliy banki ma'lum qilishicha, yangi markaz postsovet hududidagi mijozlar uchun to‘lovlarni qayta ishlaydi. Mintaqaviy tuzilma Markaziy Osiyo, Mustaqil Davlatlar Hamdo‘stligi va Sharqiy Yevropadagi foydalanuvchilarga xizmat ko‘rsatib, transchegaraviy to‘lovlar hamda pul o‘tkazmalarini, shu jumladan raqamli aktivlar bilan bog‘liq operatsiyalarni ham boshqaradi.

Moliyaviy regulyator bayonotiga ko‘ra, loyiha Qozog‘istonda tegishli Binance guruhi tashkilotini yaratishni, zarur infratuzilmani shakllantirishni va 1-toifali to‘lov muassasasi sifatida faoliyat yuritish uchun litsenziya olishni o‘z ichiga oladi. Ushbu ruxsatnoma kompaniyaga o‘zining ayrim mintaqaviy amaliyotlarini mazkur mamlakatga ko‘chirish imkonini beradi.

Mazkur kelishuv Milliy bank raisi Timur Suleymenov va Binance asoschisi Chanspen Chao ishtirokida bo‘lib o‘tgan imzolash marosimidan so‘ng e'lon qilindi. O‘tgan hafta birja Qozog‘iston institutlari bilan uchta shartnoma imzolagan edi. Jumladan, Raqamli rivojlanish vazirligi hamda Ostona xalqaro moliya markazi bilan hamkorlik bitimlari tuzilib, raqamli aktivlar va innovatsion to‘lov yechimlarini rivojlantirish ko‘zda tutilgan.